Ötən sutka ərzində dünyada koronavirusa rekord yoluxma qeydə alınıb
Bakı, 24 aprel, AZƏRTAC
Aprelin 23-də dünyada COVID-19 infeksiyasına rekord sayda - 897 min 252 yoluxma halı qeydə alınıb. Əvvəlki rekord 892 min 306 nəfərin yoluxduğu aprelin 22-də müşahidə edilmişdi.
AZƏRTAC pandemiyanın statistikasını aparan Worldometer saytına istinadla xəbər verir ki, həmçinin ötən sutka ərzində COVID-19 infeksiyası səbəbindən 14 min 249 nəfər həyatını itirib.
Aprelin 23-də Hindistanda 345 min 147 nəfərdə koronavirus infeksiyası aşkarlanıb ki, bu da indiyə qədər ölkə ərazisində qeydə alınan ən yüksək göstəricidir.
Yoluxmaların sayına görə dünyada ilk yeri isə ABŞ tutur. Burada yeni koronavirusa 32 milyon 735 min nəfər yoluxub. COVID-19 infeksiyasına yoluxma hallarının sayına görə Birləşmiş Ştatlardan sonra ikinci yerdə gedən Hindistanda bu göstərici 16 milyon 610 min nəfərə çatıb. İlk beşlikdə yer alan Braziliyada 14 milyon 238 min, Fransada 5 milyon 440 min, Rusiyada isə 4 milyon 744 min yoluxma halı qeydə alınıb.
ABŞ koronavirusdan ölənlərin sayına görə də dünya lideridir - 585 min nəfər. Braziliyada 386 min, Meksikada 214 min, Hindistanda 189 min, Böyük Britaniyada isə 127 min nəfər koronavirus infeksiyası səbəbindən həyatını itirib. Dünya üzrə COVID-19 qurbanlarının təxminən yarısı bu beş ölkənin payına düşür.
Xatırladaq ki, 2020-ci il mart ayının 11-də Ümumdünya Səhiyyə Təşkilatı yeni koronavirus infeksiyasının yayılmasını pandemiya elan edib.
Bölmənin digər xəbərləri
