Pakistanda 4 nəfərdə meymunçiçəyi xəstəliyi qeydə alınıb
İslamabad, 1 sentyabr, Hilal Əhməd, AZƏRTAC
Pakistanın Hayber-Paxtunxva əyalətində növbəti meymunçiçəyi xəstəsi qeydə alınıb. Bununla da ölkə ərazisində meymunçiçəyi xəstələrinin sayı 4 nəfərə çatıb.
AZƏRTAC xəbər verir ki, Hayber-Paxtunxva əyalətinin İctimai Səhiyyə üzrə direktoru İrşad Əli Roqaninin sözlərinə görə, xəstə Peşəvar Hava Limanında simptomlarını büruzə verdikdən sonra dərhal yerli xəstəxanalardan birinə yerləşdirilib.
Meymunçiçəyi virusu daşıyıcılarından digər iki nəfər də Peşəvar Hava Limanında aşkar olunmuşdu.
Bundan əlavə, Sind əyalətinin Səhiyyə şöbəsindən verilən məlumata görə, Kəraçi Cinna Beynəlxalq Hava Limanında da şübhəli şəxs yaxalanıb.
Pakistanın Milli Səhiyyə Nazirliyinin məlumatında meymunçiçəyi virusunun ölkədə nəzarət altında olduğu bildirilir.
Bölmənin digər xəbərləri
