Pakistanlı ekspert: Azərbaycanın keçdiyi inkişaf yolu bir çox ölkələr üçün ilham mənbəyidir
Bakı, 5 mart, AZƏRTAC
XXI əsrin diplomatiya səhnəsində dünya geosiyasətinin ənənəvi sərhədlərini aşan yeni güc mərkəzlərinin formalaşmasının şahidi oluruq. Bu prosesdə Şərq ilə Qərbin kəsişdiyi mühüm coğrafi nöqtədə yerləşən Azərbaycan xüsusi rol oynayır. Son illərdə ölkə yalnız regional deyil, həm də qlobal səviyyədə strateji əhəmiyyət daşıyan dövlətə çevrilib. Bu transformasiya təsadüfi deyil. Azərbaycanın bugünkü mövqeyi Prezident İlham Əliyevin həyata keçirdiyi düşünülmüş və uzaqgörən dövlət siyasətinin nəticəsidir.
Bunu AZƏRTAC-a açıqlamasında Dayanıqlı İnkişaf üçün Kəmər və Yol Təşəbbüsünün (BRISD) sədri, Pakistan Gənclər Hərəkatının lideri Qaiser Navab söyləyib.
O qeyd edib ki, qlobal səviyyədə qeyri-sabitlik, geosiyasi gərginlik və iqtisadi dalğalanmaların artdığı bir dövrdə Azərbaycan praqmatik diplomatiya, iqtisadi dayanıqlıq və humanitar məsuliyyətin nümunəsi kimi çıxış edir. Dayanıqlı İnkişaf üçün Kəmər və Yol Təşəbbüsünün baxışına görə Azərbaycan yalnız tərəfdaş ölkə deyil, Avrasiyada yeni əməkdaşlıq və sabitlik modelinin əsas sütunlarından biridir. Bu model qitələri birləşdirən ticarət və enerji marşrutlarının inkişafı ilə yanaşı, xalqlar arasında əməkdaşlığın gücləndirilməsinə də xidmət edir.
“Müasir beynəlxalq münasibətlər sistemi çox vaxt qarşıdurma və rəqabət üzərində qurulmuş kimi görünür. Bir çox hallarda dövlətlər öz maraqlarını yalnız digər tərəfin itkiləri hesabına təmin etməyə çalışır. Azərbaycan isə fərqli yanaşma nümayiş etdirir. Prezident İlham Əliyevin həyata keçirdiyi siyasət milli maraqların qorunması ilə yanaşı, beynəlxalq əməkdaşlığın genişləndirilməsinə yönəlmiş çoxvektorlu diplomatik xətt üzərində qurulub. Bu yanaşma ölkənin müstəqil siyasət yürütməsinə imkan verir və onu müxtəlif siyasi və iqtisadi mərkəzlər arasında etibarlı tərəfdaş kimi tanıdır. Azərbaycanın diplomatik strategiyasının əsas xüsusiyyətlərindən biri onun balanslı və praqmatik olmasıdır. Ölkə Avropa dövlətləri, Türk dünyası, həmçinin Asiya regionu ilə güclü əməkdaşlıq münasibətləri qurub. Bu siyasət Azərbaycanın beynəlxalq arenada nüfuzunu artırmaqla yanaşı, iqtisadi və siyasi sabitliyini də möhkəmləndirib. Bu baxımdan Azərbaycan qlobal logistika və enerji xəritəsində mühüm mövqeyə sahibdir. Ölkə Avropa ilə Asiyanı birləşdirən Orta Dəhlizin əsas halqasına çevrilib”,- deyə pakistanlı ekspert vurğulayıb.
Azərbaycanın humanitar təşəbbüslərə böyük dəstəyi
BRISD-nin sədri Azərbaycanın iqtisadi layihələr həyata keçirməklə yanaşı, humanitar təşəbbüslərə də böyük önəm verdiyini diqqətə çatdırıb: “Qlobal pandemiya dövründə və digər çətin humanitar situasiyalarda Azərbaycan logistika imkanlarından beynəlxalq yardımın çatdırılması üçün istifadə edib. Ölkə müxtəlif beynəlxalq təşkilatlarla əməkdaşlıq edərək humanitar dəhliz kimi çıxış edib və ehtiyacı olan dövlətlərə yardım göstərib. Bu yanaşma Azərbaycanın beynəlxalq münasibətlər sistemində etibarlı tərəfdaş kimi qəbul edilməsinə mühüm töhfə verib. Azərbaycanın qlobal rolundan danışarkən enerji təhlükəsizliyi məsələsinə xüsusi diqqət yetirmək lazımdır. Ölkə Avropanın enerji təhlükəsizliyinin təmin edilməsində mühüm rol oynayan əsas tərəfdaşlardan biridir. Cənub Qaz Dəhlizi layihəsi vasitəsilə Azərbaycan enerji resurslarını beynəlxalq bazarlara sabit və etibarlı şəkildə çatdırır. Bu layihə yalnız enerji ixracını genişləndirmir, həm də enerji bazarlarında sabitlik və əməkdaşlıq mühitinin formalaşmasına xidmət edir. Azərbaycanın enerji siyasəti resurslardan geosiyasi təzyiq aləti kimi istifadə etməyə deyil, qarşılıqlı fayda və əməkdaşlıq prinsiplərinə əsaslanır”.
Cənubi Qafqaz regionunun uzun illər münaqişələr və geosiyasi gərginliklərlə xarakterizə olunduğunu xatırladan Qaiser Navab qeyd edib ki, son illər regionda yeni reallıqlar formalaşmağa başlayıb. Azərbaycanın ərazi bütövlüyünün bərpası regionun siyasi xəritəsində mühüm dəyişiklik yaradıb və beynəlxalq hüququn prinsiplərinin bərpasına töhfə verib. Bu proses yalnız hərbi və siyasi nəticə deyil, həm də regionda yeni inkişaf mərhələsinin başlanğıcıdır:“Prezident İlham Əliyevin regional siyasətinin əsas məqsədlərindən biri Cənubi Qafqazda davamlı sülh və əməkdaşlıq mühitinin yaradılmasıdır. Azərbaycan region ölkələri arasında iqtisadi əməkdaşlığın genişləndirilməsini və yeni nəqliyyat əlaqələrinin qurulmasını dəstəkləyir. Bu yanaşma uzunmüddətli perspektivdə regionun sabitliyinə və rifahına xidmət edə bilər. Geosiyasətdə çox vaxt vurğulandığı kimi, davamlı sülh yalnız güclü və sabit dövlətlərin təşəbbüsü ilə mümkün olur. Azərbaycanın həyata keçirdiyi siyasət də məhz bu prinsipə əsaslanır. Azərbaycanın keçdiyi inkişaf yolu bir çox inkişaf etməkdə olan ölkələr üçün ilham mənbəyidir. Bu yol göstərir ki, güclü dövlət quruculuğu, strateji diplomatiya və dayanıqlı iqtisadi siyasət sayəsində ölkələr qlobal sistemdə öz layiqli yerini tuta bilər. Azərbaycanın bugünkü mövqeyi məhz belə bir inkişaf modelinin uğurlu nəticəsidir”.
Müxbir - Aytac Haqverdiyeva
Bölmənin digər xəbərləri
