Qanunsuz ov edənlərin hər biri 1000 manat cərimə ödəmişdir
Bakı, 26 fevral (AZƏRTAC). Fevralın 22-dən 24-dək Ekologiya və Təbii Sərvətlər Nazirliyinin (ETSN) aidiyyəti qurumlarının əməkdaşları ölkə ərazisində “Ovçuluq haqqında” Azərbaycan Respublikası Qanununun tələblərinə əməl olunması vəziyyətini araşdırmaq məqsədi ilə növbəti reydlər keçirmişlər.
ETSN-in mətbuat xidmətindən AZƏRTAC-a verilən məlumata görə, Ağgöl Milli Parkının ərazisində qanunsuz ov edən 1 nəfər saxlanılmış və ondan 1 ov tüfəngi götürülmüşdür.
Zəvvar Ovçuluq Təsərrüfatında da qanunu pozan Cəlilabad rayon sakini Tofiq Hacıyevdən 1 ov tüfəngi, 7 ədəd patron götürülmüş və həmin şəxs barəsində akt və protokol tərtib olunaraq inzibati qaydada 1000 manat məbləğində cərimə edilmişdir.
İsmayıllı rayonu ərazisinə baxış keçirərkən Diyalı kəndindəki göllərdə qanuna məhəl qoymayan Vüsal Xələfov, Rəşad Şahbazzadə, Cavanşir Xələfov, Tərlan Babayev və Gündüz Həmzəyevdən 5 ov tüfəngi götürülərək aktlaşdırılmışdır. Onların hər biri 1000 manat cərimə ödəmişdir.
Xaçmaz rayonunun Nərəcan kəndi ərazisində isə çöl quşlarının kütləvi ovlanması məqsədi ilə quraşdırılmış süni qurğu və torlar məhv edilmişdir.
Kürdəmir şəhərində dəmiryol stansiyasının yaxınlığındakı kafedə ov quşlarının satışı aşkar olunmuşdur. Çöl quşları aktlaşdırılaraq yandırılmışdır.
Bölmənin digər xəbərləri
