Qış tətilini Qax rayonunun istirahət mərkəzlərində keçirənlərin sayı ildən-ilə artır
Qax, 3 yanvar (AZƏRTAC). Əsrarəngiz təbiəti, zəngin fauna və florası ilə fərqlənən Qax rayonunda son illər turizmin digər növləri kimi, qış turizmi də inkişaf etməkdədir. Yeni il bayramını və qış tətili günlərini burada keçirmək arzusunda olanların sayı ildən-ilə artır.
AZƏRTAC-ın müxbiri rayonun iri turizm mərkəzlərində olmuş, istirahətə gələnlər üçün yaradılmış şəraitlə maraqlanmışdır.
İlisu kəndində fəaliyyət göstərən “Uludağ” Turizm və İstirahət Mərkəzi ilboyu turistlərin xidmətindədir. Burada hər cür şəraiti olan 8 kottec tipli mənzil fəaliyyət göstərir. Mərkəzdə eyni vaxtda 110 turist yerləşə bilir. Səhər yeməyi də daxil olmaqla, bir nəfər üçün birgünlük yaşayış və xidmət haqqı 30 manat təşkil edir. Bu qiymət turistləri tam qane edir. Mərkəzin direktoru Zabit Əhmədov bildirir ki, tətil günlərində mərkəzdə boş yer olmamışdır. Yeni il gecəsində mərkəzə yerli turistlərlə yanaşı, Türkiyə, Rusiya və Almaniyadan qonaqlar da təşrif buyurmuşlar. Turistlər üçün əyləncəli bayram proqramı hazırlanmış, istirahətə gələnlər Şaxta baba və Qar qızla birlikdə doyunca əylənmişlər. Mərkəzin rəhbərinin dediyinə görə, tələbatı nəzərə alaraq gələcəkdə yerlərin sayının artırılması, xidmətlərin çeşidinin çoxaldılması, həmçinin dağlara, kəndin və rayonun tarixi yerlərinə turların təşkil edilməsi nəzərdə tutulur.
İlisu kəndinin girəcəyində yerləşən “Yaşıl park” İstirahət Mərkəzində də bayram tətili günlərində qələbəlik olmuşdur. Mərkəzdə 72 yerlik 21 kottec fəaliyyət göstərir. Burada da qiymətlər münasibdir. Bir nəfər üçün səhər yeməyi də daxil olmaqla bir gün üçün 30 manat təşkil edir.
Qış tətili günlərini “Eı Resort” otelində keçirənlər burada yaradılan şəraitdən razıdırlar. Otelin meneceri Şamil Əfəndiyevin bildirdiyinə görə, Yeni il əyləncələri dekabrın 29-dan başlanmışdır. 108 yerlik oteldə dincələnlərin əksəriyyəti ailəvi istirahətə gələnlərdir. Adi günlərdə burada ikinəfərlik otaqların qiyməti 80-200 manat arasında dəyişir. Bayram günlərində isə xidmətlərin çeşidinin çoxalması ilə əlaqədar qiymətlər nisbətən artmışdır. Beş günlük bayram paketinə səhər, nahar və şam yeməkləri, Yeni il karnavalı, diskoteka, Bakıdan və Ukraynadan gəlmiş müğənnilərin iştirakı ilə konsertlər, şou-əyləncəli proqramlar, təbiət qoynuna, rayonun tarixi abidələrinə səyahət turları daxil edilmişdir. Bayram günlərində turistlər Azərbaycan və dünya mətbəxinin ləziz təamları ilə yanaşı, bu yerlərə xas “sürhüllü” və digər xəmir xörəklərindən də dadmışlar.
Hazırda “El Resort” otelinin ərazisində 5 mərtəbəli, 164 yerlik yeni korpusun tikintisi sürətlə davam etdirilir.
lisu kəndinin “Səngər qala” adlı istirahət mərkəzində də 5 mərtəbəli, 100 yerlik otel binasının tikintisində tamamlama işləri aparılır. Otelin bu ilin ortalarında istifadəyə verilməsi gözlənilir.
Bölmənin digər xəbərləri
