Qubada qəzalı körpünün bərpasına başlanılıb VİDEO
Quba, 24 aprel, Elxan Yusifli, AZƏRTAC
Qubanın Birinci və İkinci Nügədi kəndlərinin sərhədində, Qaraçayın üzərindəki qəzalı vəziyyətdə olan körpünün bərpasına başlanılıb.
Rayon icra hakimiyyətinin başçısı İlqar Mahmudov və Avtomobil Yolları Dövlət Agentliyinin İdarə Heyətinin sədr müavini Əvəz Qocayev mütəxəssislərlə birlikdə Quba-Qonaqkənd-Muçu avtomobil yolunun 7-ci kilometrində yerləşən körpüdə yaranmış qəzalı vəziyyətlə yerində tanış olublar.
Quba rayon Fövqəladə Hallar Komissiyasının sədri Tariyel İbrahimov AZƏRTAC-ın bölgə müxbirinə bildirib ki, mövcud vəziyyət ətraflı müzakirə olunub və qısa vaxtda görüləcək tədbirlər müəyyənləşdirilib.
"Artıq bu gündən rayonun Birinci və İkinci Nügədi kəndlərinin sərhədində, Qaraçayın üzərindəki qəzalı vəziyyətdə olan körpünün bərpasına başlanılıb. Körpü qısa müddətdə bərpa olunaraq sakinlərin istifadəsinə veriləcək. Amma növbəti mərhələdə həmin ərazidə yeni körpünün tikintisi nəzərdə tutulur. Bu məsələlər daha ətraflı müzakirə edildikdən sonra yekun qərar veriləcək",- deyə Tariyel İbrahimov söyləyib.
Bölmənin digər xəbərləri
