DÜNYA
Ramazan Almaniya cəmiyyətinin bir hissəsinə çevrilir
Berlin, 14 mart, AZƏRTAC
Hər gün daha çox müsəlman Almaniyada uzun müddətə, bir çoxu isə həmişəlik məskunlaşır. Tədricən müsəlmanlar üçün müqəddəs olan Ramazan ayı çoxetnik alman cəmiyyətinin həyatında ən əhəmiyyətli hadisələrdən birinə çevrilir.
Hər axşam Almaniyanın şəhərlərində iftar süfrələri açılır. Ramazan ayının başlanması ərəfəsində isə Almaniya şəhərlərində mərasimlər keçirildi, bu müddət ərzində “Ramazan ayınız mübarək!” yazıları şəhər gecələrini işıqlandırdı, habelə, ulduzlar, fənərlər və aypara şəklində təqdim edilən kompozisiyalar restoran və kafelərin yerləşdiyi piyada küçələrinə rəngarənglik gətirdi.
AZƏRTAC xəbər verir ki, yerli hakimiyyət orqanları və Almaniya mediasının qeyd etdiyinə görə, ilk dəfədir ki, alman şəhərləri Ramazan ayında küçələrin işıqlandırılmasını təşkil edir. Bunlar isə hər şəhərə təxminən 75 min avroya başa gəlir.
Frankfurt-Mayn şəhərinin meri Nargis Eskandari-Qrünberg bunu “şəhərin bütün insanlarının dinc və yanaşı yaşamasını simvolizə edən gözəl jest” adlandırıb.
“Böhranlar və müharibələr zamanı bu cür işıqlandırma tədbirləri bütün insanlar üçün ümidverici əlamətdir və müxtəlifliklərlə dolu şəhər cəmiyyətimizin vəhdətini artırır”, – deyə o bildirib.
Almaniyanın 750 mindən çox əhalisi olan maliyyə mərkəzində təxminən 100 min müsəlman yaşayır.
“Bild” qəzetinin yazdığına görə, Kölndə də ilk dəfə Ramazan ayına həsr olunmuş küçə bəzəkləri meydana çıxıb, lakin onlar dövlət vəsaiti deyil, özəl ianələr hesabına maliyyələşdirilib.
Eyni zamanda, Ramazan ayının ölkənin bayram təqvimində görünməsi ilə bağlı yerli sakinlərin fikirləri olduqca müxtəlifdir və heç də bütün rəylər müsbət deyil. Hessendən olan və ultra sağçı AfD Partiyası rəy sorğularında yüksək yer tutan regional qanunverici Robert Lambru Ramazan bəzəklərini “İslama tabe olmaq jesti” hesab edib və qınayıb.
Çələngləri asmaq fikri Şəhər şurasının üzvü, kansler Olaf Şoltsun Sosial Demokrat Partiyasından olan Ömər Şehataya məxsusdur. Şehata “Frankfurter Allgemeine” qəzetinə açıqlamasında, keçən il ilk dəfə Ramazan ayında şəhəri işıqlara qərq edən Londondan ilham aldığını söyləyib. AfD-nin tənqidlərinə cavab olaraq isə Şehata bildirib: “Frankfurtda bir çox insan sağçı ekstremizm, antisemitizm və anti-müsəlman irqçiliyinə qarşı vahid cəbhədən çıxış edir”.
Vüqar Seyidov
AZƏRTAC-ın xüsusi müxbiri
Berlin