RƏSMİ XRONİKA
RAYON AĞSAQQALI UMUD TANRIVERDİYEVİN ÇIXIŞI
Siz Prezident kimi ilk dəfə bizim rayona təşrif buyurmusunuz. Sizin gəlişiniz Xanlar rayonu əhalisinin hədsiz sevincinə səbəb olmuşdur.
Sizin regionlara səfərlərinizi diqqətlə izləyirik. Əhali ilə, sadə adamlarla səmimi ünsiyyətinizi görmüşük. Ulu öndərimiz Heydər Əliyev iki dəfə bizim rayona gəlmişdi. Xidməti işimlə əlaqədar olaraq mən onu müşayiət edən adamların arasında olmuşam və onu yaxından izləmişəm. Nə qədər sadə insan idi, zəhmət adamlarının necə qayğısına qalırdı. Bu gün demək istəyirəm ki, Siz onun işlərinin hamısının gözəl davamçısısınız.
Keçən il Bozdağ kəndi təbii fəlakətə uğradı. Torpaq sürüşməsi nəticəsində kənd yasa batmışdı. Biz bilmirdik kimə müraciət edək, necə edək. Yalnız Sizin Sərəncamınızla ayırdığınız vəsait və gündəlik nəzarətiniz sayəsində dağıntılar bərpa olundu, yeni məktəb tikildi. İndi hamı Sizə minnətdarlığını bildirir və Sizə dua edir.
Hörmətli Prezident, biz xanlarlılar heç vaxt yaddan çıxarmarıq ki, Siz bizim rayon üçün nələr etmisiniz. Hamısı, inkişafımız da göz qabağındadır.
Hörmətli Prezident, bir məsələni də demək istəyirəm. Qarşıdan seçkilər gəlir. Camaatın içində olan bir adam kimi deyirəm ki, bu seçkilərdə bizim yalnız bir, alternativsiz namizədimiz var, o da Sizsiniz. Ona görə mən ürəklə deyirəm ki, seçkilərdə yüz faiz biz Prezidentimizə - İlham Əliyevə səs verəcəyik.
Biz bu seçkilərdə birlikdə göstərəcəyik ki, demokratiya necə olur, seçki necə olur və Prezident necə olmalıdır. O da yenə bizim İlham Əliyevdir.
Hörmətli Prezident, rayonumuza gələcəyinizi bir neçə gün bundan əvvəl eşitdik. Oturduq məsləhətləşdik, fikirləşdik ki, biz Prezidentdən nə xahiş edək, nə istəyək. Sonra gördük ki, işığımız var, suyumuz var, qazımız var, güzəranımız yaxşılaşır, iş yerləri açılır. Gənclər artıq başqa yerlərdən buraya qayıdırlar. Daha xahiş ediləsi bir şey qalmadı. Dedik, onda arzu edək ki, Prezident bundan sonra uzun illər, ömürlük bizə rəhbərlik etsin. Camaatın bu arzusunu Sizə çatdırıram.
Hörmətli Prezident, mən bir məsələni deməyə bilmərəm. Ermənistanda keçirilən seçkilərdən sonrakı hadisələri izləyirik. Biz görürük ki, orada nə hadisələr baş verir. Məşhur erməni şairi Çarens var idi. Onun bir fikri hələ də məni düşündürür. Çox gözəl deyirdi. Deyirdi ki, bizim millətin bəlası orasındadır ki, ana bətnində saxtakarlıq öyrənirik. Həmin bu saxtakar millət çalışır ki, seçki keçirsin, indi o ölkə qan ağlayır. Belə insanlarla necə qonşuluq edə bilərik. Bir də ki, onlar bizim qonşumuz olmayıb, onları bizə qonşu gətiriblər. Hörmətli Prezidentimiz çıxışında İrəvan mahalı, İrəvan xanlığı barədə deyib.
Hörmətli Prezident, Sizə uzun ömür, cansağlığı arzulayırıq, xanlarlılar həmişə Sizi gözləyəcəklər. Sağ olun.
X X X
Prezident İlham Əliyev mərasimdən sonra icra hakimiyyətinin binası ilə, habelə rayonun sosial-iqtisadi göstəricilərini və aparılan quruculuq işlərini əks etdirən stendlə tanış oldu. Bildirildi ki, icra hakimiyyətinin binası yenidən qurulmuşdur. Binanın tikintisinə 1985-ci ildə başlanmış, lakin yarımçıq qalmışdı, 1990-cı illərin əvvəllərində isə baxımsızlıq ucbatından tamamilə dağıdılmışdı. 2006-cı ildə binada əsaslı yenidənqurma işləri aparılmışdır. Əvvəllər ayrı-ayrı köhnə evlərdə yerləşən dövlət idarə və təşkilatları da bu altımərtəbəli binaya köçürülmüşdür.
Məlumat verildi ki, Xanlarda kanalizasiya xətti yox idi. Son bir il ərzində 18 kilometrədək kanalizasiya xətti çəkilmiş, içməli su problemi də tamamilə həll olunmuşdur.