“Regional” Televiziya 7 yaşını qeyd edir
Xaçmaz rayonunda fəaliyyət göstərən “Regional” Televiziya Şirkəti (RTV) noyabrın 15-də 7 yaşını qeyd edib.
AZƏRTAC xəbər verir ki, RTV Azərbaycanda daxili şəbəkəsi rəqəmsal texnologiya ilə təchiz olunan ilk televiziya kanalıdır. Ölkənin şimal bölgəsində yayımlanan bu televiziya kanalı Xaçmaz, Quba, Qusar, Şabran, Siyəzən, Xızı rayonlarını əhatə edir. Quba rayonunun Dağlı kəndi və Siyəzən rayonunun Gilgilçay qəsəbəsi ərazisində yerləşdirilən ən son model teleötürücülər regionda keyfiyyətli yayım həyata keçirməyə imkan verir. Paralel olaraq televiziya www.regionaltv.az saytı vasitəsilə onlayn yayım da həyata keçirir. RTV yayımlanmağa başladığı gündən bölgədə yaşayan insanları dolğun informasiya ilə, zövqlü televiziya proqramları ilə təmin etməyi qarşısına məqsəd qoyub.
Kollektiv uzun illərin televiziya təcrübəsinə malik peşəkar kadrlarla yanaşı, həm də istedadlı, perspektivli gənclərdən təşkil olunub. RTV-də 100-ə yaxın əməkdaş çalışır. Onların 90 faizi regionu təmsil edir. Yerli gənclər RTV-nin təlim-tədris bazasında televiziya işinin sirlərini öyrənirlər.
RTV fəaliyyətə başladığı ilk gündən Azərbaycandakı region televiziyaları üçün əlçatmaz hesab olunan bir çox uğurlara imza atıb. Fəaliyyəti dövründə televiziyanın istehsalı olan bir sıra layihələr müxtəlif yerli və beynəlxalq festivallarda uğur qazanıb. Televiziyanın əməkdaşları ABŞ, Türkiyə, Rusiya, Almaniya, Böyük Britaniyada təcrübə keçib.
“Regional” TV-nin gün boyu efirində regionlarda baş verən ictimai-mədəni hadisələr, idman yarışları, həyata keçirilən sosial-iqtisadi layihələr, abadlaşan və inkişaf edən kəndlərimiz, uzun müddət efirlərdən uzaq qalan regionların istedadlı insanları haqqında dolğun proqramlar yer alır.
Bölmənin digər xəbərləri
