Respublika çempionatı başa çatıb
Bakı, 4 aprel, AZƏRTAC
Ali təhsil müəssisələrinin tələbələri arasında stolüstü tennis idman növü üzrə respublika çempionatına yekun vurulub.
Təhsil Nazirliyi, Gənclər və İdman Nazirliyi, Azərbaycan Təhsil İşçiləri Azad Həmkarlar İttifaqı Respublika Komitəsi, Azərbaycan Həmkarlar İttifaqları İdman Təşkilatları İctimai Birliyinin dəstəyi, “Təhsil” Respublika İdman Mərkəzi və “Gənclik” Tələbə İdman Cəmiyyəti Respublika Şurasının təşkilatçılığı ilə ali təhsil müəssisələrinin tələbələri arasında “Şüa” İdman Kompleksində keçirilən respublika çempionatının proqramına daxil olan stolüstü tennis idman növü üzrə yarışlar başa çatıb.
Təhsil Nazirliyindən AZƏRTAC-a bildiriblər ki, gərgin və maraqlı mübarizə şəraitində keçən yarışın nəticələrinə əsasən, birinci yeri Azərbaycan Dövlət Bədən Tərbiyəsi və İdman Akademiyası, ikinci yeri Bakı Avrasiya Universiteti, üçüncü yeri isə Bakı Dövlət Universitetinin komandası tutub.
Qeyd edək ki, ali təhsil müəssisələrinin tələbələri arasında respublika çempionatının proqramına 10 idman növü daxildir. Bunlar mini futbol, basketbol, stolüstü tennis, şahmat, veloidman, badminton, voleybol, atletika, yunan-roma güləşi və sərbəst güləş idman növləridir.
Bölmənin digər xəbərləri
