Respublika Seysmoloji Xidmət Mərkəzi ilə Meksikanın Seysmoloji Mərkəzi arasında əməkdaşlıq başlayır
Bakı, 17 iyun, AZƏRTAC
İyunun 17-də Meksikanın Azərbaycandakı səfiri Rodrigo Labardini və onun müavini Alberto Aura Gonzalez AMEA nəzdində Respublika Seysmoloji Xidmət Mərkəzində (RSXM) olublar.
RSXM-nin İnformasiya şöbəsindən AZƏRTAC-a bildiriblər ki, görüşdə AMEA-nın vitse-prezidenti, Yer elmləri bölməsinin rəhbəri, akademik İbrahim Quliyev, Respublika Seysmoloji Xidmət Mərkəzinin baş direktoru, AMEA-nın müxbir üzvü, professor Qurban Yetirmişli, mərkəzin Beynəlxalq əlaqələr şöbəsinin müdiri Telman Cəfərov və İnformasiya şöbəsinin müdiri Vüsalə Rafiqqızı iştirak ediblər.
Professor Qurban Yetirmişli səfirə ötən ilin oktyabr ayında RSXM-də qonaq olduğunu xatırladaraq, tərəflər arasında növbəti görüşün keçirilməsi təşəbbüsünə görə minnətdarlıq edib. Alim mərkəzdə görülən işlər haqqında ətraflı məlumat verib.
RSXM-nin beynəlxalq əlaqələrini genişləndirdiyini bildirən professor Q.Yetirmişli deyib ki, Böyük Britaniyanın Oksford və Kembric universitetləri ilə əməkdaşlığın qurulmasına dair bu ilin birinci yarısında çoxsaylı görüşlər və müzakirələr aparılıb. Yaxın vaxtlarda hər iki universitetin nümayəndələri Azərbaycana səfər edəcəklər. Baş direktor, həmçinin qonaqlara Ukrayna Elm və Texnologiya Mərkəzinin dəstəyi ilə həyata keçirilən “Qafqazda və Mərkəzi Asiyada seysmik şəbəkənin genişləndirilməsi” (Seismic Network Expasion in the Caucasus and Central Asia) layihəsi çərçivəsində Azərbaycanda quraşdırılacaq seysmik stansiyalarla bağlı məlumat verib. 22 seysmik stansiyanın artıq ölkəmizə gətirildiyini deyən professor Q.Yetirmişli qeyd edib ki, həmin stansiyaların 12-si palçıq vulkanlarının ətrafında quraşdırılacaq. Hazırda stansiyaların quraşdırılması istiqamətində intensiv iş gedir.
RSXM-nin baş direktoru görüşdə Qarabağda quraşdırılacaq seysmik stansiyalar haqqında danışıb. “Bilirsiniz ki, ötən il bizim ölkəmizin və xalqımızın həyatında xoş hadisə oldu. Qarabağ münaqişəsinin həlli ilə bağlı Zəfər əldə olundu. Biz 30 ildən sonra öz torpaqlarımızı işğaldan azad etdik və indi Qarabağda Prezidentin rəhbərliyi ilə böyük quruculuq işlərinə başlanılıb. İşğaldan əvvəl bizim Ağdam, Cəbrayıl və Kəlbəcərdə seysmik stansiyalarımız var idi. İşğal dövründə ermənilər orada hər şeyi dağıdıblar və siz özünüz də o dağıntılardan xəbərdarsınız. Bununla bağlı kifayət qədər görüntülər də var. Ona görə də indi biz azad olunmuş Qarabağımızda yeni seysmik stansiyalar quraşdıracağıq. Ümumilikdə 2025-ci ilə qədər bu proses davam edəcək və Qarabağda RSXM tərəfindən 10 seysmik stansiya quraşdırılacaq. Həmin stansiyaları quraşdırdıqdan sonra biz orada kompleks seysmoloji tədqiqatlar aparacağıq”.
Meksikanın Azərbaycandakı səfiri Rodrigo Labardini bildirib ki, Meksikanın Milli Muxtar Universiteti və Meksikanın Seysmoloji Mərkəzi Azərbaycan tərəfi ilə əməkdaşlıq etməyə dair öz təkliflərini göndəriblər. Seysmoloji tədqiqatların aparılması və palçıq vulkanlarının öyrənilməsi sahəsində Azərbaycan seysmoloqlarının təcrübəsinin Meksikada maraq doğurduğunu qeyd edən səfir ölkəsinin birgə əməkdaşlığa dair ekspertlər səviyyəsində müzakirələr aparılması və saziş imzalanmasını təklif etdiyini deyib.
Akademik İbrahim Quliyev çıxışında Meksika universitetləri ilə əməkdaşlığın prioritetlərinə toxunarkən bunun həm böyük beynəlxalq layihələr çərçivəsində, həm də ikitərəfli müstəvidə mümkün olduğunu bildirib. Alim, həmçinin qonaqlara Azərbaycanda palçıq vulkanlarının ətrafında seysmik stansiyaların quraşdırılmasından sonra palçıq vulkanlarının öyrənilməsində yeni bir mərhələnin başlanılacağını deyərək, bu istiqamətdə əməkdaşlığın əhəmiyyətli olduğunu deyib.
Müzakirələr zamanı Meksika universitetlərinin RSXM-nin, Böyük Britaniyanın Oksford və Kembric universitetləri ilə həyata keçirəcəyi meqalayihəyə qoşulmasının mümkünlüyü də istisna edilməyib. Müzakirələrin nəticəsi olaraq tərəflər əməkdaşlıq istiqamətlərinə dair təkliflərin hazırlanması və bu istiqamətdə müzakirələrin davam etdirilməsinə dair razılıq əldə ediblər.
Bölmənin digər xəbərləri
