SİYASƏT
“RUSİYA XALQLARI ASSAMBLEYASI” AZƏRBAYCAN DİASPORU İLƏ SIX ƏMƏKDAŞLIĞA TƏRƏFDARDIR
“Rusiya Xalqları Assambleyası” Ümumrusiya ictimai təşkilatının sədri Ramazan Abdulatipov fevralın 11-də Ümumrusiya Azərbaycan Konqresi (ÜAK) ilə RF Dövlət dumasının Millətlərin İşləri Komitəsi arasında əməkdaşlıq haqqında sazişin imzalanmasını alqışlamış, bunu Azərbaycan diasporunun Rusiyanın dövlət təsisatları ilə qarşılıqlı fəaliyyəti sahəsində mühüm addım adlandırmışdır.
R.Abdulatipov AZƏRTAC-ın müxbirinə demişdir ki, ÜAK-ın Millətlərin İşləri Komitəsi ilə əməkdaşlığının böyük əhəmiyyəti vardır, çünki bu Komitə milli siyasət məsələləri ilə və Rusiyada yaşayan milli azlıqlarla qarşılıqlı əlaqələrlə federal səviyyədə məşğul olan yeganə dövlət təşkilatıdır. R.Abdulatıpov bildirmişdir ki, “Rusiya Xalqları Assambleyası” Duma komitəsi ilə də, öz xalqını ölkədə layiqincə təmsil edən Azərbaycan Konqresi ilə də sıx əlaqədə işləyir. Onun fikrincə, indi Rusiyadakı Azərbaycan diasporu ÜAK-ın simasında ciddi ictimai qüvvədir və fəaliyyət göstərdiyi qısa müddətdə ölkədəki digər diasporlar arasında müəyyən mövqe tuta bilmişdir.
R.Abdulatipov vurğulamışdır ki, Rusiyadakı azərbaycanlıların da, başqa millətlərin nümayəndələrinin də problemləri çoxdur və təəssüf ki, vəziyyət onlar üçün heç də həmişə əlverişli olmur. Ona görə də ictimai təşkilatların həmişə birlikdə olması və Rusiyanın rifahı naminə, ölkədə sabitlik naminə sıx qarşılıqlı fəaliyyət göstərmələri vacibdir.
R.Abdulatipov demişdir ki, “Rusiya Xalqları Assambleyası” Millətlərin İşləri Komitəsi və ÜAK ilə birlikdə Bakıda “Azərbaycanın və Rusiyanın dostluq konqresi” devizi altında forum keçirməyi nəzərdə tutur. İndi bu konqresə hazırlıq görülür, onun keçirilməsi müddəti dəqiqləşdirilir.
Asya Hacızadə
AZƏRTAC-ın xüsusi müxbiri
Moskva