Rusiyanın Kiyevə hücumu zamanı beynəlxalq təşkilatların ofislərinə ziyan dəyib, 1 nəfər yaralanıb
London, 28 avqust, AZƏRTAC
Rusiya silahlı qüvvələrinin Ukraynanın paytaxtı Kiyevə endirdiyi genişmiqyaslı raket və dron hücumu nəticəsində “British Council”ın Kiyevdəki ofisinə ciddi ziyan dəyib.
AZƏRTAC “Sky News”a istinadla xəbər verir ki, qurumun icraçı direktoru Skott Makdonald ofisin mühafizəçisinin yaralandığını, vəziyyətinin sabit olduğunu, lakin ağır sarsıntı keçirdiyini deyib.
“British Council”in sözçüsü qurumun Kiyevdəki ofisinin növbəti bildirişədək bağlı qalacağını deyib: “Cavablarımızda müəyyən gecikmələr ola bilər, amma Ukraynadakı tərəfdaşlarımızla təhsil və mədəniyyət sahəsində əməkdaşlığımız davam edir”,- deyə o diqqətə çatdırıb.
“Sky News” diplomatik mənbələrə istinadla bildirib ki, Britaniya Xarici İşlər Nazirliyi Rusiyanın Londondakı səfirini çağırmağı planlaşdırır.
Hücum zamanı Avropa İttifaqının Ukraynadakı nümayəndəliyinin binası da zədələnib.
Aytən Abbaslı
AZƏRTAC-ın xüsusi müxbiri
London
Bölmənin digər xəbərləri
