Sabunçuda səsvermənin gedişində qanun pozuntusu qeydə alınmayıb
Bakı, 23 dekabr, AZƏRTAC
Sabunçu rayonundakı 28 saylı Sabunçu III seçki dairəsinin əhatə etdiyi seçki məntəqələrində səsvermə seçicilərin fəallığı ilə davam edir.
AZƏRTAC xəbər verir ki, saat 2-dək bu seçki dairəsi üzrə 12 min 906 seçici məntəqələrə gələrək səs verib.
Sabunçu III seçki dairəsi Maştağa, Nardaran, Bilgəh, Zabrat və Kürdəxanı bələdiyyələrini əhatə edir. Seçici siyahılarına səsvermə hüququ olan 49 min 830 vətəndaşın adı daxil edilib. Seçicilər 36-sı daimi olmaqla 38 məntəqədə səs verirlər. Məntəqələrin 10-da veb-kamera quraşdırılıb.
Dairə seçki komissiyasının sədri Hacıbala Babayev məlumat verib ki, bütün seçki məntəqələrində səsvermənin şəffaflığı üçün normal şərait yaradılıb. Mərkəzi Seçki Komissiyası məntəqələri avadanlıq və təbliğat-təşviqat materialları ilə təmin edib. Səsvermənin gedişini izləmək üçün 10 partiyadan, qeyri-hökumət təşkilatlarından, müstəqil qurumlardan 426 yerli müşahidəçi qeydiyyatdan keçib. Bu vaxtadək seçkilərin nəticələrinə təsir edən qanun pozuntusu qeydə alınmayıb.
Bölmənin digər xəbərləri
