Sahib Alıyev: Azərbaycan koronavirusa qarşı regional və qlobal müstəvidə fəal mübarizə aparır
Bakı, 22 mart, Səadət Hakıyeva, AZƏRTAC
Prezident İlham Əliyevin Novruz bayramı münasibətilə xalqa təbrikinin əsas hissəsini bütün dünyanı təlatümə gətirən və insanları qorxuya salan koronavirusdan (COVID-19) qorunma, onunla mübarizə tədbirlərinə həsr olunmuşdu. Dövlətimizin başçısının bu məsələnin üzərində ayrıca dayanması gözlənilən idi. Kəskin fəsadlara yol açan və saysız-hesabsız insan ölümünə səbəb olan koronavirusla mübarizə, bu təhlükəli virusdan minimum zərərlə xilas olmaq vacib məsələlərdəndir və hər birimizi düşündürür.
Bu sözləri AZƏRTAC-a açıqlamasında Milli Məclisin deputatı Sahib Alıyev deyib.
Deputat bildirib: “Prezident İlham Əliyev Azərbaycan xalqına müraciət edərək insanları ayıq-sayıq və təmkinli olmağa çağırdı. Dövlətimizin başçısının nitqində nikbin, qətiyyətlilik notları ilə yanaşı, ehtiyatlılıq məqamları da özünü büruzə verirdi. Nikbin notlar dövlətin hadisələrə vaxtında, çevik reaksiya verdiyini və təşvişə düşməyərək sinxron şəkildə qərarlar qəbul etdiyini deməyə əsas verir. Qətiyyətlilik isə özünü onda göstərdi ki, Prezident İlham Əliyev dövlətimizin lazım olan bütün addımları atacağını vurğuladı. Dövlətimizin başçısı təbrik nitqində lazım gələcəyi təqdirdə ölkədə fövqəladə vəziyyət elan olunacağını da istisna etmədi. Bu, bizi qorxulu düşmənlə mübarizədə son dərəcə ehtiyatlı olmağa səsləyir”.
S.Alıyevin sözlərinə görə, dünyanın qabaqcıl ölkələrinin təcrübəsi də onu göstərir ki, bu virusun yoluxma arealının harada başlayıb, harada qurtaracağını proqnoz vermək çox çətindir. Birinci vitse-prezident Mehriban Əliyevanın da müraciətində qeyd etdiyi kimi, son dərəcə yüksək inkişaf etmiş texnologiyaya malik ölkələr koronavirus qarşısında aciz qalıblar.
Dövlətimizin virusla mübarizədə bütün mümkün tədbirləri gördüyünü deyən S.Alıyev bildirib ki, dövlətimizin başçısının 2020-ci il 19 mart tarixli Sərəncamı ilə Azərbaycan Respublikası Prezidentinin ehtiyat fondundan Koronavirusla Mübarizəyə Dəstək Fonduna ilkin olaraq 20 milyon manat ayrılıb. Bu da onu sübut edir ki, belə çətin məqamda dövlətimiz öz üzərinə düşən vəzifəni artıqlaması ilə yerinə yetirir. Dövlətimizin başçısının şəxsi nümunə göstərərək bir illik əməkhaqqı məbləğini Koronavirusla Mübarizəyə Dəstək Fonduna ianə etməsini nəcib təşəbbüs adlandıran deputat başqalarını da bu kampaniyaya qoşulmağa çağırıb.
Ümumdünya Səhiyyə Təşkilatının (ÜST) ölkəmizdə koronavirusa qarşı aparılan mübarizə tədbirlərini yüksək qiymətləndirməsinin heç də təsadüfi olmadığını diqqətə çatdıran Sahib Alıyev deyib: “Azərbaycan virusla mübarizə üçün yüksək texnologiyaya malik laboratoriya alan ölkələr sırasındadır. Dövlətimizin başçısı təbrik nitqində vurğuladı ki, Azərbaycanda virusu müəyyən etmək üçün 10 belə laboratoriya var və gələcəkdə lazım gələrsə, sayı artırılacaq. Operativ Qərargah çox fəal işləyir. Təbii ki, dövlət strukturları da öz işlərini təlimatlara uyğun şəkildə qurublar. Milli Məclisdə bu məsələ ilə bağlı İnzibati Xətalar Məcəlləsində də dəyişikliklər edilib”.
Azərbaycanın koronavirusa qarşı regional və qlobal müstəvidə fəal mübarizə apardığını söyləyən deputat ölkəmizin virusla mübarizə aparmaq üçün ÜST-ə və milyonlarla soydaşımızın yaşadığı qonşu İrana maddi yardım göstərdiyini qeyd edib.
Deputat koronavirus kimi təhlükəli xəstəliyə qarşı mübarizədə əsas işin sağlamlıqlarını təhlükəyə atan həkimlərin və tibbi xidmət personalının üzərinə düşdüyünü diqqətə çatdırıb. Bildirib ki, Azərbaycan Prezidentinin yeni infeksiya ilə mübarizə tədbirlərində iştirak edən tibb işçilərinin sosial müdafiəsinin gücləndirilməsi haqqında Sərəncamı onların əməyinə verilən qiymətdir.
Onun sözlərinə görə, dünya təcrübəsi də göstərir ki, sağlam düşüncəli, nizam-intizamlı cəmiyyətdə ümumi bəlaya qarşı mübarizə aparmaq daha asandır. Bu gün kimliyindən asılı olmayaraq, hər bir azərbaycanlının sağlamlığı hamımız üçün doğması, yaxını və elə həm də özü qədər önəmlidir. Bu gün hər birimizin sağlamlığı bu və ya digər dərəcədə hamımızın sağlamlığı deməkdir. Hazırda hər bir azərbaycanlının virusa yoluxmamaq üçün Nazirlər Kabineti yanında fəaliyyət göstərən Operativ Qərargahın tövsiyələrinə riayət etməsi, məsuliyyətli davranması, sağlamlığını qoruması təkcə özünün deyil, doğmalarının, yaxınlarının, bütövlükdə millətinin sağlamlığına xidmətdir.
Sahib Alıyev belə çətin məqamda bəzi üzdəniraq qüvvələrin canfəşanlığından da danışıb. O deyib: “Xainlər, müstəqilliyimizin, ölkəmizin düşmənləri belə çətin məqamda vəziyyətdən sui-istifadə edir, dövlətimizin gördüyü tədbirlərə don geyindirməyə çalışır, təşviş yaradırlar. Bu gün milli birlik və bərabərlik ideyaları hər cür siyasi iddiadan yüksək olmalı, növbəti inkişafımızı təmin etmək üçün siyasi sistemimizin bütün daxili aktorları öz güclərini dövlətçilik maraqlarımız ətrafında səfərbər etməlidirlər”.
Deputat xalqımızın koronavirusdan mümkün qədər ən az itki ilə çıxması üçün əlindən gələni əsirgəməyən dövlətimizin gücünə inamını ifadə edib.
Bölmənin digər xəbərləri
