Sahib Məmmədov: Azərbaycanda turizmin inkişafı üçün geniş potensial mövcuddur
Bakı, 27 fevral, AZƏRTAC
Azərbaycanda turizmin inkişafı dövlət siyasətinin əsas prioritet istiqamətlərindəndir. Görülən işlər nəticəsində qeyri-neft sektorunun inkişafında turizmin payı artmaqdadır.
AZƏRTAC xəbər verir ki, bunu Azərbaycan Həmkarlar İttifaqları Konfederasiyasının (AHİK) sədri Sahib Məmmədov fevralın 27-də parlamentdə keçirilən “Azərbaycanda turizmin mövcud vəziyyəti və inkişaf perspektivləri” mövzusunda ictimai dinləmədə çıxışı zamanı deyib.
O bildirib ki, Azərbaycanda turizmin inkişafı üçün geniş potensial mövcuddur. Ölkəmizin əsrarəngiz təbiəti, unikal memarlıq nümunələri olan tarixi abidələri, qədim adət-ənənələri və qonaqpərvərliyi turizmin inkişafı üçün geniş imkanlar yaradır: “Azərbaycan Həmkarlar İttifaqları Konfederasiyasında aparılan islahatlara uyğun olaraq idarəetmənin səmərəliliyinin artırılması məqsədilə müalicə və istirahət mərkəzləri “Kurort” Qapalı Səhmdar Cəmiyyətində birləşdirilib. Hazırda burada ümumi tutumu 1500 çarpayı olan 13 sağlamlıq mərkəzi fəaliyyət göstərir. Bu isə sağlamlıq turizmi üçün yaxşı imkandır”.
Bölmənin digər xəbərləri
