Sədr müavini: Balıqçılığın və akvakulturanın inkişafına diqqət artırılır
Bakı, 11 aprel, AZƏRTAC
Azərbaycan Respublikası Prezidentinin 19 dekabr 2024-cü il tarixli Fərmanı ilə balıqçılıq və akvakulturanın inkişafı istiqamətində fəaliyyətlər Kənd Təsərrüfatı Nazirliyinə həvalə edilib. Bununla əlaqədar olaraq Kənd Təsərrüfatı Nazirliyi tərəfindən müxtəlif fəaliyyətlər icra edilməkdədir.
Bu barədə AZƏRTAC-a müsahibəsində Aqrar Xidmətlər Agentliyinin sədr müavini Elməddin Namazov deyib.
O, qeyd edib ki, Fərmana uyğun olaraq yaradılan Balıqçılıq və Akvakultura Mərkəzi publik hüquqi şəxsin yaradılması üzrə işlər tamamlanmaq üzrədir. Həmçinin, balıqçılıq və akvakultura sahəsində elmi-tədqiqat fəaliyyətinin icrası üçün Hevandarlıq Elmi Tədqiqat İnstitutunun bazasında müvafiq struktur bölmənin yaradılması nəzərdə tutulub. Bununla yanaşı, Aqrar Xidmətlər Agentliyinin strukturunda balıqçılıq şöbəsi yaradılıb.
“Heyvan sağlamlığının və baytarlıq xidmətlərinin təşkili sahəsində müasir metodların tətbiqinə dair keçirilən tədbirin də məqsədi ölkə üzrə baytar mütəxəssislərin heyvan sağlamlığı, balıq xəstəlikləri və akvakulturanın təşkili üzrə bilik və bacarıqlarının artırılması, eləcə də bununla bağlı ictimai məlumatlılığının təmin edilməsidir. Hazırda balıqçılıq və akvakultura sahəsində sektorun inkişaf perspektivlərinin, müvafiq dövlət dəstəyi və tənzimləmələrin müəyyənləşdirilməsi, balıqartırma müəssisələrinin təhvil-təslim prosesinin təşkili, akvakultura subyektlərinin mövcud vəziyyəti, onların qeydiyyatı və monitorinqinin təşkili, həmçinin müvafiq sahə üzrə elektron qeydiyyat idarəetmə sisteminin yaradılması istiqamətində fəaliyyətlər icra edilməkdədir. Kənd Təsərrüfatı Nazirliyi tərəfindən kənd təsərrüfatının digər sahələrində olduğu kimi, balıqçılıq və akvakultura sahəsinin inkişaf planı və müvafiq dövlət dəstəyi mexanizmlərinin hazırlanması üçün beynəlxalq təcrübə araşdırılmaqdadır. Bu məqsədlə, qardaş Türkiyəyə təlim səfəri təşkil olunub, həmçinin Türkiyənin Kənd təsərrüfatı və Meşə Nazirliyinin mütəxəssisləri ölkəmizə dəvət edilib. Müvafiq olaraq beynəlxalq təcrübə nəzərə alınmaqla balıqçılıq və akvakultura sahəsində qanunvericiliyin təkmilləşdirilməsi, eləcə də balıq ovu və akvakulturanın təşkili və bu sahədə dövlət nəzarətinin həyata keçirilməsi ilə bağlı təkliflər hazırlanmaqdadır”, - deyə sədr müavini qeyd edib.
E.Namazov bildirib ki, Xəzər dənizi, ölkədaxili sularda balıq və su bioresurslar ehtiyatların artırılması, dayanıqlı istifadəsinə nail olunması bu sahə üzrə siyasətin əsas hədəflərindən biridir. Agentliyin sədr müavini hazırda qlobal iqlim dəyişikliyi fonunda su resurslarının azaldığını və daha dayanıqlı istifadənin vacib olduğunu da vurğulayıb: “Bildiyimiz kimi, Xəzər dənizi və daxili sularda mövcud su resurslarından səmərəli və dayanıqlı istifadə eməklə akvakultura təsərrüfatlarının yaradılması və onların inkişafına dəstək verilməsi əsas prioritet sahələrdəndir. Su resurslarından səmərəli istifadə, həmçinin ölkə üzrə balıq və su bioresursların istehsalının artımına nail olunması əsas hədəf olaraq müəyyənləşdirilib. Bu istiqamətdə düzgün strategiyanın aparılması və tətbiqi ölkə üzrə balıqçılıq məhsulları ilə təminatın dayanıqlılığına töhfə verəcək” .
Bölmənin digər xəbərləri
