Şəhid qardaşı: Onun Vətən sevgisi hər şeydən üstün idi VİDEO
Beyləqan, 8 oktyabr, Aydın Yavərzadə, AZƏRTAC
Elnur Vəliyev uşaqlıqdan qoçaqlığı ilə seçilib. O, hələ kiçik yaşlarından canından da çox sevdiyi Vətənini qorumaq üçün hərbçi olmağı arzulayıb. Elə bu amal uğrunda da 44 günlük Vətən müharibəsində şəhidlik zirvəsinə yüksəlib.
AZƏRTAC-ın bölgə müxbiri xəbər verir ki, Elnur 1999-cu il avqustun 30-da Beyləqan rayonunun Təzəkənd kəndində dünyaya göz açıb. Xarakterinə və əxlaqına görə hər zaman seçilən Elnur azyaşlı olmasına baxmayaraq, qəlbində Vətən sevgisi ilə böyüyüb.
Şəhidin anası Zeynəb Vəliyeva deyir ki, övladı 18 yaşında həqiqi hərbi xidmətə yollanıb. Hərbi xidməti başa vurduqdan sonra yenidən ordu sıralarına qoşularaq, Vətənin keşiyində dayanıb. Onun döyüş yolu Murovdağ istiqamətindən başlayıb. "Elnur bu döyüşlərdə qəhrəmanlığı ilə seçilib. Torpaqlarımızı azad görmək istəyirdi, bu amal uğrunda da qəhrəmancasına şəhidlik zirvəsinə ucaldı. Qürur duyuram ki, övladım torpaqlarımızın azadlığı uğrunda canından keçərək adını tarixə yazdırdı”, - deyən şəhid anası bildirir ki, indi Qarabağ azaddır, şanlı bayrağımız torpaqlarımızda dalğalanır: “Bu sevincli günlərimiz üçün Elnur kimi qəhrəman övladlarımıza minnətdarıq. Bu Qələbə onların fədakarlığı sayəsində qazanıldı. Onlar canlarını Vətən uğrunda fəda edərək, Azərbaycanı qalib ölkə kimi bütün dünyaya göstərdilər".
Şəhidin qardaşı Pərviz də Elnur haqqında qürurla danışır və onunla fəxr etdiyini deyir. “Onun Vətən sevgisi hər şeydən üstün idi. Hər zaman deyirdi, “gün gələcək Qarabağı azad edəcəyik”. Şəhidlik onun üçün ən ali məqam idi. İndi bütün şəhidlər mənim qardaşımdır. Onlar ölməzliyə qovuşublar və Azərbaycanın tarixində unudulmaz iz buraxıblar”, - deyə Pərviz bildirir.
Qeyd edək ki, Elnur Vəliyev göstərdiyi igidlik və şücaətə görə “Azərbaycan Bayrağı” ordeni, “Vətən uğrunda”, “Cəsur döyüşçü” və “Kəlbəcərin azad olunmasına görə” medalları ilə təltif olunub.
Bölmənin digər xəbərləri
