Şərqşünaslıq İnstitutunda “Çoxəsrlik tariximizin Heydər Əliyev zirvəsi” mövzusunda tədbir keçirilib
Bakı, 7 may, AZƏRTAC
Mayın 7-də AMEA-nın akademik Ziya Bünyadov adına Şərqşünaslıq İnstitutunda “Çoxəsrlik tariximizin Heydər Əliyev zirvəsi” mövzusunda tədbir keçirilib.
İnstitutdan AZƏRTAC-a bildirilib ki, tədbir Ümummilli Lider Heydər Əliyevin anadan olmasının 102-ci ildönümünə həsr edilib.
Tədbiri açan AMEA-nın vitse-prezidenti, Şərqşünaslıq İnstitutunun direktoru akademik Gövhər Baxşəliyeva Ulu Öndərin Azərbaycan xalqının həyatında oynadığı böyük roldan danışıb. O, Ümummilli Liderin xalqımızın tarixinə böyük qurucu şəxsiyyət kimi düşdüyünü qeyd edib. G.Baxşəliyeva Ulu Öndər Heydər Əliyevin həm sovet dövründə, həm də müstəqillik illərində rəhbərliyi zamanı Azərbaycanda böyük iqtisadi inkişafa nail olunduğunu vurğulayıb.
Heydər Əliyevin liderlik keyfiyyətlərinin dünya miqyasında qəbul olunduğunu deyən Gövhər Baxşəliyeva, onun siyasətinin Prezident İlham Əliyev tərəfindən layiqincə davam etdirildiyini qeyd edib. O, Azərbaycan dövlətinin beynəlxalq aləmdə nüfuzunun artmasında, ölkəmizin söz sahibi olan qüdrətli dövlətə çevrilməsində Ulu Öndər Heydər Əliyevin və Prezident İlham Əliyevin xidmətlərinin əvəzsiz olduğunu bildirib.
Şərqşünaslıq İnstitutunun şöbə müdiri professor Roida Rzayeva tədbirdə çıxış edərək, Heydər Əliyevin Azərbaycan tarixində əvəzsiz yeri olduğunu söyləyib. Professor əsası Ümummilli Lider tərəfindən qoyulmuş azərbaycançılığın müstəqil Azərbaycanın fəlsəfi və sosial doktrinasının sosial-mədəni və etnik, geosiyasi aspektlərini özündə cəmləşdirdiyini bildirib.
Tədbirdə, həmçinin institutun baş elmi işçisi siyasi elmlər doktoru Adil Mirabdullayev və aparıcı elmi işçi pedaqogika üzrə fəlsəfə doktoru Lalə Mikayılzadə çıxış edərək Azərbaycan dövlətçiliyinin qorunmasında, dövlətin inkişafında Ümummilli Lider Heydər Əliyevin xidmətlərindən danışıblar.
Bölmənin digər xəbərləri
