Bakı, 13 iyul, AZƏRTAC

Bu ilin altı ayının sosial-iqtisadi yekunlarına həsr olunmuş müşavirədə Prezident İlham Əliyev beynəlxalq hüququn işləməməsi və dünyada ciddi təhdidlərin olmasını bildirib. Azərbaycan Prezidenti deyib ki, beynəlxalq hüququn təminatçısı rolunu öz üzərinə götürən böyük dövlətlər bu hüququ pozurlar və sonra da onu əsaslandırırlar. Beynəlxalq münasibətlər sistemində qaydaların pozulduğu, beynəlxalq təşkilatların qərarlarına, qətnamələrinə məhəl qoyulmadığı dövrdə güclü olmaq zərurətə çevrilib. Hazırda əsas prioritetlərdən biri də Ordumuzun gücləndirilməsidir.

Bu fikirləri AZƏRTAC-a müsahibəsində Həmvətənlərə Dəstək İctimai Birliyinin təsisçisi, ehtiyatda olan polkovnik-leytenant, hərbi-siyasi ekspert Elmar Hüseyn deyib.

Bildirilib ki, Azərbaycan 30 il beynəlxalq hüququ dəstəkləyib. Xalqımız doğma torpaqlarımızın sülh yolu ilə işğaldan azad olunacağına inanıb. Ancaq Qarabağın Ermənistana birləşdirilməsi prosesinə beynəlxalq birlik uzun müddət səssiz qalıb. Nəhayət, bu məsələ 2020-ci ildə Azərbaycanın öz ərazi bütövlüyünü və tarixi ədaləti hərbi-siyasi yolla bərpa etməsi və BMT Təhlükəsizlik Şurasının qətnamələrinin icrasını özü təmin etməsi ilə nəticələnib. Dünyada müəyyən məsələlərin güc yolu ilə həlli ordumuzun inkişafını zəruri edib. Dövlətimizin başçısı müşavirədəki çıxışında ordumuzun güclü olmasının əsas istiqamətlərini göstərdi. Bunlar özümüzü, müstəqilliyimizi müdafiə etməkdir.

Hərbi-siyasi ekspertin sözlərinə görə, dövlətimizin başçısı müşavirədə müstəqilliyimizi, seçimimizi, həyat tərzimizi, ərazi bütövlüyümüzü qorumaq üçün daha güclü olmağın əhəmiyyətini qeyd edib. “İkinci Qarabağ müharibəsi başa çatandan sonra biz dayanmadan bu istiqamətdə çox ciddi addımlar atmışdıq və mən bunu artıq bildirmişəm, bir də demək istəyirəm, bu gün Azərbaycan Silahlı Qüvvələri daha böyük hərbi potensiala malikdir. Həm döyüş qabiliyyəti, həm silah və texnika ilə təchizat baxımından daha da güclü olacağıq, çünki bu proses dayanmır və dayanmamalıdır. Mən demişəm, iki istiqamət üzrə - hərbi potensial və azad edilmiş torpaqların bərpasına nə qədər vəsait lazımdır biz o qədər də ayıracağıq”.

Ehtiyatda olan polkovnik-leytenantın fikrincə, Ali Baş Komandanımız çıxışı zamanı hərbi potensialın gücləndirilməsinin istiqamətlərdən birinin yüksək texnologiyalı hərbi sistemlərin alınması, digərinin isə birləşmə və bölmələrin yaradılması olduğunu diqqətə çatdırıb. Burada insan resurslarından düzgün istifadə olunması istiqamətləri vacibdir. Buna görə də müharibə başa çatandan sonra ardıcıl şəkildə bu istiqamətdə çox ciddi addımlar atıldı. Bu kontekstdə Azərbaycan Silahlı Qüvvələrinin qüdrəti, ölkəmizin hərbi potensialı artırıldı.

Dövlət büdcəsinin mühüm hissəsi ordu quruculuğuna ayrılacaq

Azərbaycanın öz seçimini edərək dünyada dost və qardaş ölkələrlə münasibətlərini daha da möhkəmləndirir. Ona görə də bu təhdidlər daha dərin və strateji ordu yaradılmasını zəruri edir. Bu baxımdan da dövlət büdcəsinin mühüm hissəsinin ordu quruculuğuna ayrılması fikri müşavirədə səsləndirildi.

Elmar Hüseyn qeyd edib ki, dövlətimizin başçısı büdcəyə əlavədə ikinci əsas istiqamətin hərbi gücümüzün artırılması ilə bağlı olduğunu söyləyib: “Dürüstləşmə zamanı bizim əsas iki istiqamətimiz də çox açıq-aydın qoyulmuşdur. Bütövlükdə 3 milyard manatdan çox vəsait əlavə edildi. Bunun 1,8 milyard manat hissəsi Qarabağın və Şərqi Zəngəzurun bərpa edilməsinə istiqamətləndirilmişdir, 1,1 milyard manat isə hərbi potensialımızın güclənməsinə. Yəni, ayrılmış məbləğin mütləq əksəriyyəti bu iki istiqamətə yönəldilmişdir və bu da təbiidir. Çünki bu gün ölkə qarşısında duran iki əsas vəzifə məhz bu vəzifələrdir.... Qeyd etdiyim kimi, bizim büdcə dürüstləşməsindən sonra iki əsas istiqamətimiz Qarabağın, Şərqi Zəngəzurun bərpası və hərbi qüdrətimizin artırılması idi”.

Dövlət büdcəmizin dürüstləşməsi zamanı əlavə əldə edilən gəlirlər müxtəlif istiqamətlərdə - tarixi torpaqlarımızda vətəndaşlarımızın rifahının yaxşılaşdırılması, onlara normal şəraitinin yaradılması, dünya standartlarına uyğun qayıdış planının həyata keçirilməsi və yaşayış məntəqələrinin inşasına xərclənəcək.

Prezident İlham Əliyev müşavirədə bu siyasəti aparmaqla ölkəmizin nüfuzunun artırıldığını deyib: “Çünki bu gün dünyada güc amili ön plandadır və güclə hesablaşırlar, gücdən çəkinirlər. Biz son iki il yarım ərzində bir neçə dəfə bunu bir neçə ünvana göstərmişik və heç kim bizim iradəmizə təsir edə bilməz. Əksinə, bizə qarşı tuşlanmış bütün oxları sındırıb öz ləyaqətimizi qoruya bilmişik və maraqlarımızı qoruya bilmişik, daha əlavə sözlərə ehtiyac yoxdur, hər şey göz qabağındadır. Necə deyərlər, dərinə getmək istəmirəm, amma bunu artıq hər kəs görür, görməlidir və bilməlidir ki, Azərbaycanla hədə-qorxu, ultimatum dili ilə heç kim danışa bilməz və hesab edirəm ki, bundan sonra belə cəhdlər də olmayacaq”.

Azərbaycanın hərbi qüdrəti daha da artırılır

Vətən müharibəsi veteranı bildirib ki, müşavirədə Prezidentin dediyi kimi, Silahlı Qüvvələrimizin modernləşdirilməsi sahəsində az danışmaq, çox iş görmək lazımdır. Ordumuzun formalaşdırılması üçün müasir silah və texnikanın alınması və məxfi saxlanılması onun daha strateji tapşırıqların icrasına yönəlməsini göstərir. Bu istiqamətində işlər plan üzrə gedir. İkinci Qarabağ müharibəsindən sonra Silahlı Qüvvələrimizdə aparılan islahatlar, Ordunun modernləşdirilməsi prosesi, müasir silah-sursat, hərbi texnika ilə təminat işləri davam etdirilir. Eyni zamanda, bu gün Azərbaycanın öz maraqlarına uyğun siyasət yürüdür, heç kimi qarşısında əyilmir və heç bir qüvvənin iradəsinə tabe olmayır. Ölkəmizin gücü, hərbi qüdrətinin artırılması bunu təmin edən əsas amildir.

Prezident açıq şəkildə qeyd etdi ki, bizimlə güc yolu ilə danışmaq istəyənlərə onların dili ilə cavab verərək bir neçə dəfə yerinə otuzdurduq. Qlobal dünyada dövlətlərin müstəqilliyinə və ərazi bütövlüyünə iki istiqamətdə - biri güc, digəri isə iqtisadi və maliyyə yolu ilə qəsd olunur. Elə bu baxımdan da dövlətimizin başçısı diqqətə çatdırıb ki, Azərbaycan istər pandemiya dövründə, istərsə də son illər inflyasiyanın qarşısını alan ölkələrdən biridir.

“İkinci istiqamət isə aydın şəkildə ordu quruculuğu məsələsidir. Dünyanın üçüncü dəfə bölüşdürülməsi proseslərinin qarşısını almaq üçün mütləq şəkildə hər bir dövlət özünümüdafiə hüququna malik olmalıdır. Eləcə də özünü müdafiə edəcək dövlətlərin hərbi sənayesi, ordusunun formalaşması, ştat strukturu üçün maliyyə vəsaitlərinin olması mühüm şərtdir. Dövlətimizin həyata keçirdiyi məqsədyönlü siyasət nəticəsində düşmənin revanşist niyyətləri puç oldu. Əgər Ermənistan şərti sərhəddə hər hansı istiqamətdə təxribat törətsəydi və Ordumuzun apardığı əməliyyatlarla onun qarşısı alınmasaydı, düşmən ölkənin havadarları onlara daha çox silah-sursat ötürəcəkdi. Belə ki, ordumuzun inkişafı bu revanşizm cəhdlərinin qarşısının alınmasına töhfə verir”, - deyə hərbi-siyasi ekspert vurğulayıb.

Ermənistanla münasibətlərə, sülh danışıqları məsələsinə toxunan E.Hüseyn deyib ki, Azərbaycanın sülh danışıqları ilə bağlı aydın və məntiqli addımları beynəlxalq hüquqa əsaslanır. Danışıqlar prosesində müsbətə doğru hərəkət olması, Ermənistanın Qarabağ və anklav kəndlər də daxil olmaqla Azərbaycanın ərazi bütövlüyünü, suverenliyini tanıması və sərhədlərini qəbul etməsi mühüm uğurlardır. Xüsusi qeyd edilməlidir ki, Ermənistan bu nöqtəyə öz xoşu ilə gəlməyib, Azərbaycanın ardıcıl, prinsipial siyasi xətti, təzyiqləri onu buna məcbur edib.