Sumqayıtda ümumşəhər bayram tədbiri keçirilib
Sumqayıt, 15 iyun, Ətrabə Rzayeva, AZƏRTAC
Sumqayıtdakı “Kimyaçı” Mədəniyyət Sarayında 15 İyun - Milli Qurtuluş Gününə həsr olunmuş ümumşəhər bayram tədbiri keçirilib. Tədbirdə şəhər rəhbərliyi, Milli Məclisin komitə sədrləri Tahir Mirkişili, Hicran Hüseynova, idarə, müəssisə, təşkilat rəhbərləri və şəhər ictimaiyyəti iştirak edib.
AZƏRTAC xəbər verir ki, əvvəlcə iştirakçılar Ümummilli Lider Heydər Əliyevin adını daşıyan parkda dahi rəhbərin abidəsini ziyarət edib, önünə tər çiçəklər düzüblər.
Mədəniyyət Sarayının tamaşa zalında davam edən tədbir Azərbaycanın Dövlət Himninin səsləndirilməsi ilə başlayıb.
Ulu Öndərin və şəhidlərin əziz xatirəsi bir dəqiqəlik sükutla yad edilib.
Sumqayıt Şəhər İcra Hakimiyyətinin başçısı Zakir Fərəcov çıxışında bildirib ki, 1990-cı illərin əvvəllərində ölkədə yaranan xaos və milli dövlətçiliyin yox olmaq təhlükəsi Azərbaycan xalqını ciddi narahat edirdi. Çıxılmaz vəziyyətdə qalan xalq öz xilaskarına üz tutdu. Ümummilli Liderimiz Heydər Əliyev taleyinə yazılmış xilaskarlıq missiyasını bu ağır günlərdə öz üzərinə götürdü. Beləliklə də, xalqın təkidli tələbi ilə Ulu Öndər Heydər Əliyevin hakimiyyətə qayıdışı xalqın qurtuluşu oldu.
Qeyd edilib ki, Heydər Əliyevin siyasi zəkası nəticəsində xalqımız XX əsrin çox çətin sınaqlarından müstəqil Azərbaycan dövlətini qurmaqla çıxdı.
Vurğulanıb ki, Azərbaycanı öz varlığı qədər sevən Heydər Əliyev onun gözəl bir guşəsi olan Sumqayıtı da çox sevirdi. “Sumqayıtı bütün Azərbaycanın gözəl təcəssümü” adlandırır və onun tərəqqisi üçün mümkün olan hər şeyi edirdi. Sumqayıtlılar bu diqqət və qayğını həmişə hiss etmişlər. Siyasi hakimiyyətdə olduğu illərdə 16 dəfə Sumqayıta gələn Heydər Əliyevin hər səfəri şəhərin tarixində əlamətdar tarixi hadisə olmuşdur. Ulu Öndərin Sumqayıta etdiyi bu səfərlər şəhər sakinlərində daim sabaha ümid yaradıb, gələcəyə inamı artırıb. Qədirbilən sumqayıtlılar Ümummilli Lider Heydər Əliyevin Sumqayıta diqqət və qayğısını son dərəcə yüksək qiymətləndirirlər.
Qeyd olunub ki, Prezident İlham Əliyevin həyata keçirdiyi çox uğurlu daxili, xarici və iqtisadi siyasət nəticəsində Azərbaycanın əldə etdiyi nailiyyətlər qloballaşan dünyada dövlətimizin qarantına çevrilmişdir. 44 günlük Vətən müharibəsində Azərbaycan əsgəri, sözün əsl mənasında, xalqımızın hərb və qürur tarixini yazdı. Rəşadətli Silahlı Qüvvələrimiz uzun müddət davam edən münaqişənin cəmi 44 gün ərzində hərbi yolla sürətli və ədalətli həllinin mümkünlüyünü bütün dünyaya sübut etdi. 30 ilə yaxın müddətdə düşmən əsarətində olan torpaqlarımız Müzəffər Ali Baş Komandanın müdrik siyasəti və qətiyyəti sayəsində azad olundu. Torpaqlarımızı azad etməklə biz dünyaya qalib xalq, qalib dövlət kimi tanındıq.
Sonra Milli Qurtuluş Gününə həsr olunan sənədli film nümayiş etdirilib.
Tədbir konsert proqramı ilə davam edib.
Bölmənin digər xəbərləri
