Şuşada Türk Dünyası Sığorta Birliyinin ilk Assambleyası keçirilib YENİLƏNİB VİDEO
Şuşa, 14 sentyabr, Tahir Ağaməmmədov, AZƏRTAC
Şuşa şəhərində Türk Dünyası Sığorta Birliyinin birinci Assambleyası keçirilib.
AZƏRTAC-ın bölgə müxbiri xəbər verir ki, Assambleya Azərbaycan Mərkəzi Bankının strateji dəstəyi, Azərbaycan Sığortaçılar Assosiasiyasının təşkilatçılığı və Türk Dövlətləri Təşkilatının iştirakı ilə baş tutub. Assambleyada Azərbaycan Mərkəzi Bankının sədrinin birinci müavini Əliyar Məmmədyarov, Milli Məclisin deputatı Naqif Həmzəyev, Türk Dövlətləri Təşkilatının rəsmisi Fərid Məmmədov, habelə Azərbaycan, Qazaxıstan, Qırğızıstan, Türkiyə, Özbəkistan və Şimali Kipr Türk Respublikasının maliyyə requlyatorları və sığorta assosiasiyalarının nümayəndələri iştirak ediblər.
Assambleya çərçivəsində Türk Dünyası Sığorta Birliyinin Türk Dövlətləri Təşkilatının məqsəd və prinsiplərinə əsaslanaraq yenidən formalaşdırılmasına dair “Proklamasiya sənədi” imzalanıb. Bununla da Birliyə 5 təsisçi üzvdən əlavə 3 ölkənin (Macarıstan, Türkmənistan və Şimali Kipr Türk Respublikası) sığorta assosiasiyaları da müşahidəçi qismində daxil olublar.
Assambleyada “Türk dünyası sığorta sənayesində requlyativ yanaşmalar” və “Türk Dünyası Sığorta Birliyi: qarşıda duran hədəflər və perspektivlər” adlı iki panel üzrə sektor əhəmiyyətli aktual mövzular ətrafında geniş müzakirə aparılıb.
Tədbirin sonunda Türk Dünyası Sığorta Birliyinin 2026-cı ildə nəzərdə tutulan assambleyasının keçiriləcəyi ölkə də bəlli olub. Birlik üzvlərinin yekdil qərarı ilə Türk Dünyası Sığorta Birliyinin növbəti assambleyası 2026-cı ildə Türkiyədə keçiriləcək.
Xatırladaq ki, Türk Dünyası Sığorta Birliyi 2022-ci il mayın 24-də Türkiyənin İstanbul şəhərində keçirilən Beynəlxalq Sığorta Zirvəsində Azərbaycan, Qazaxıstan, Qırğızıstan, Türkiyə və Özbəkistanın sığorta assosiasiyalarının üzvlüyü ilə təsis edilib.
11.09
Türk Dünyası Sığorta Birliyinin birinci Assambleyası bu gün Azərbaycanın Şuşa şəhərində öz işinə başlayıb.
AZƏRTAC-ın bölgə müxbiri xəbər verir ki, Azərbaycan Mərkəzi Bankının strateji dəstəyi, Azərbaycan Sığortaçılar Assosiasiyasının təşkilatçılığı və Türk Dövlətləri Təşkilatının iştirakı ilə baş tutan assambleya Türk dünyası sığortaçılarını ilk dəfə geniş tərkibdə bir araya gətirir.
Assambleyada Azərbaycan, Qazaxıstan, Qırğızıstan, Türkiyə, Özbəkistan və Şimali Kipr Türk Respublikasının maliyyə requlyatorları və sığorta assosiasiyaları iştirak edirlər.
Assambleya "Türk dünyası sığorta sənayesində requlyativ yanaşmalar" və "Türk Dünyası Sığorta Birliyi: qarşıda duran hədəflər və perspektivlər" adlı 2 panel üzrə müzakirələr təşkil olunacaq.
Assambleya çərçivəsində, həmçinin türk dövlətlərinin sığortaçıları arasında birgə sənədin imzalanması da nəzərdə tutulub.
Bölmənin digər xəbərləri
