Tarix Muzeyində “Nizami Gəncəvi və Azərbaycan Atabəyləri dövləti” adlı sərgi açılıb
Bakı, 17 iyun, AZƏRTAC
İyunun 17-də AMEA Milli Azərbaycan Tarixi Muzeyində “Nizami Gəncəvi və Azərbaycan Atabəyləri dövləti” adlı sərginin açılış mərasimi keçirilib.
AZƏRTAC xəbər verir ki, muzeyin baş direktoru, akademik Nailə Vəlixanlı tədbirin əhəmiyyəti barədə məlumat verib. Bildirib ki, muzeydə qorunub saxlanılan qiymətli eksponatlar və nümayiş etdirilən qədim əlyazmalar, böyük ədiblərin əsərlərinə miniatürlər, xalq yaradıcılığı və tətbiqi sənət nümunələri, görkəmli şəxsiyyətlərlə bağlı nadir sənədlər, həmçinin müxtəlif əsrlərə aid digər maddi mədəniyyət abidələri ziyarətçilərdə tariximizin və mədəniyyətimizin bu günədək keçdiyi inkişaf yolu barədə ətraflı təsəvvür formalaşdırmağa imkan verir. Azərbaycan Respublikası Prezidentinin Sərəncamına əsasən, 2021-ci ilin ölkəmizdə “Nizami Gəncəvi İli” elan edildiyini xatırladan akademik diqqətə çatdırıb ki, bu il, həmçinin Azərbaycan dövlətçiliyinin inkişafında böyük rol oynamış Atabəylər dövlətinin yaranmasının 885 yaşı tamam olur.
N.Vəlixanlı muzeydə “Nizami Gəncəvi İli” çərçivəsində keçirilən tədbirlər barədə də məlumat verib.
AMEA-nın vitse-prezidenti, akademik İsa Həbibbəyli çıxışında xalqımızın tarixi yaddaşında silinməz iz qoyan, tükənməz araşdırma mənbəyi olan Nizami yaradıcılığının gələcək nəsillərə örnək və sərgidə nümayiş olunan eksponatların tədqiqat xarakterli olduğunu vurğulayıb. Akademik qeyd edib ki, bu sərgi Nizami irsi ilə tanış olmaq və klassik irsi təbliğ etmək baxımından əhəmiyyətli rol oynayır.
Daha sonra filologiya üzrə fəlsəfə doktoru Bəxtiyar Əsgərov şairin “Xəmsə”sinə daxil olan əsərlərə istinadən ibrətamiz kəlamlarında yüksək insani dəyərlərə qiymət verdiyini və dünya irsinə layiqli töhfələr bəxş etdiyini bildirib. Həmçinin B.Əsgərov muzeyin Azərbaycan Atabəyləri dövrü və Nizami dövrünə aid eksponatlara verdiyi qiymətdən danışıb. O qeyd edib ki, bu dövr Azərbaycan mədəniyyətinin intibahının yüksəliş dövrü olub.
Sərginin kuratoru Elmi ekspozisiya və sərgilərin təşkili şöbəsinin müdiri Səbuhi Əhmədov bildirib ki, muzeyin Arxeologiya, Etnoqrafiya, Köməkçi tarixi fənn materiallarından, Numizmatika, Xüsusi, Silahlar və bayraqlar fondlarında qorunan tarixi eksponatlar nümayiş olunmaqla ümumilikdə sərgidə 250 eksponatdan istifadə edilib.
Sərgidəki eksponatlar XII - XIII əsrin əvvəllərinə aid olub Azərbaycanın əsasən Gəncə, Beyləqan, Bərdə, Mingəçevir, Şabran, Naxçıvan şəhərlərində aşkar edilib. Bəzi eksponatlar ziyarətçilərə ilk dəfə təqdim olunur. Eksponatlar sırasında Mirzə Məhəmməd Axundovun 1909-cu ildə Gəncədə nəşr olunmuş “Şeyx Nizami. Tərcümeyi-halı” kitabçası xüsusi maraq doğurur.
Sonra tədbir iştirakçıları sərgi ilə tanış olublar.
Bölmənin digər xəbərləri
