MƏDƏNİYYƏT
“Tarixə bir nəzər” fotomüsabiqəsinin qaliblərinin adları açıqlanmışdır
Bakı, 28 dekabr (AZƏRTAC). Dekabrın 28-də Yasamal Rayon Heydər Əliyev Mərkəzində “Tarixə bir nəzər” fotomüsabiqəsinin qaliblərinin adları açıqlanmışdır.
AZƏRTAC xəbər verir ki, tədbirdə turizm sahəsinin inkişafına dəstək vermək, gənclərin asudə vaxtlarının səmərəli təşkilini, maraq və meyllərini təmin etmək məqsədilə Bakı Şəhər Mədəniyyət və Turizm İdarəsinin şəbəkəsinə daxil olan mədəniyyət müəssisələrində yaradılmış “Gənc turist” klubları barədə məlumat verilmişdir.
Bildirilmişdir ki, 2011-ci ildə təşkil edilmiş klublar dövlət siyasətinin həyata keçirilməsində gənclərin fəal iştirakını təmin etmək, onları bu sahənin inkişafına cəlb etmək və sistemli fəaliyyətlərinə zəmin yaratmaq istiqamətində mühüm addımlardan biridir. Klublar, həmçinin turizm sahəsinə meylli gənclərin savadlı kadr kimi yetişməsinə köməklik göstərir.
Qeyd olunmuşdur ki, bu müddət ərzində “Gənc turist” klubları üçün bir çox layihələr həyata keçirilmişdir. Cari ilin noyabr-dekabr aylarında Bakı Şəhər Mədəniyyət və Turizm İdarəsinin təşkilatçılığı ilə tarix və mədəniyyət abidələrinin təbliği məqsədilə “Tarixə bir nəzər” fotomüsabiqəsi reallaşdırılmışdır. Müsabiqəyə Bakı şəhərində yerləşən tarix və mədəniyyət abidələrinin fotoları qəbul edilmişdir. Təqdim olunmuş 100-dən çox fotolara professional münsiflər heyəti tərəfindən baxış keçirilmiş, qaliblər müəyyən edilmişdir.
Sonra təqdim edilmiş fotolardan ibarət slayd nümayiş olunmuşdur.
Münsiflər heyətinin üzvü, Azərbaycan Fotoqrafları Birliyinin sədri Mirnaib Həsənoğlu müsabiqəyə təqdim olunmuş fotolar, onlardakı müsbət və mənfi cəhətlər barədə məlumat vermişdir. O, müsabiqənin təşkilatçılarına təşəkkürünü bildirmiş, bu yarışmada iştirak etmiş həvəskar fotoqraflara uğurlar arzulamışdır.
Sonra qaliblərin adları açıqlanmışdır. Səbail rayonu üzrə “Gənc turist” klubunun üzvü Aytən Cəfərova birinci, Binəqədi rayonundakı “Gənc turist” klubunun üzvü Aygün Qasımova ikinci, Xəzər rayonu üzrə “Gənc turist” klubunun üzvü Orxan Əliyev isə üçüncü yerlərə layiq görülmüşlər.