“TEKNOFEST ŞKTC 2025”də iştirak etmək üçün müraciət edənlərin sayı 47 minə çatıb
Ankara, 25 mart, AZƏRTAC
Mayın 1-dən 4-dək Şimali Kipr Türk Cümhuriyyətində (ŞKTC) keçiriləcək “TEKNOFEST-2025” Aviasiya, Kosmonavtika və Texnologiya Festivalında iştirak etmək üçün müraciət edənlərin sayı 47 minə çatıb.
AZƏRTAC xəbər verir ki, bu barədə Türkiyə Texnologiya Komandası Fondunu (T3 Fondu) təmsil edən festivalın təşkilatçıları bildiriblər.
T3 Fondundan verilən məlumata görə, ŞKTC Prezident Administrasiyasının himayəsi altında keçiriləcək genişmiqyaslı tədbirdə 15 mindən çox komanda iştirak edəcək.
Lefkoşadakı keçmiş “Ercan” Hava Limanının ərazisində təşkil edilən texnologiya müsabiqələrin qalibləri 7 əsas kateqoriya və 14 alt kateqoriya üzrə elan ediləcək.
“TEKNOFEST-2025” çərçivəsində pilotaj komandalarının çıxışı da planlaşdırılır. Solotürk və “Türk Ulduzları”ndan olan pilotlar ŞKTC paytaxtının səmasında bacarıqlarını nümayiş etdirəcəklər.
Bundan əlavə, F-4 və HÜRKUŞ təyyarələrinin, ATAK hücum helikopterlərinin, ANKA 3, Bayraktar TB2 və Bayraktar TB3 tipli pilotsuz uçuş aparatlarının da uçuşları planlaşdırılır.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
