MƏDƏNİYYƏT
Turistlər Qaxın istirahət mərkəzlərində yaradılmış şəraitdən razılıq edirlər
Qax, 4 yanvar (AZƏRTAC). Biz 45 nəfərlik qrupla bura gəlmişik. Bakıda reklam şirkətində çalışırıq. İldə bir dəfə kollektivimizlə Azərbaycanın müxtəlif bölgələrinə səyahətə çıxırıq, istirahət edirik. Bu dəfə Qax rayonunu məsləhət gördülər. Təəssüratımız çox əladır.
Bu fikirləri bayram tətili günlərini Qax rayonunun İlisu kəndində yerləşən “Uludağ” Turizm və İstirahət Mərkəzində keçirən reklam şirkətinin meneceri Ülvi Əliyev AZƏRTAC-a müsahibəsində bildirmişdir.
Qaxda ilk dəfə olduqlarını söyləyən Ülvi Əliyev demişdir: “Uca dağlar, meşəlik ərazi, təmiz hava, yaxşı infrastruktur və ən əsası, qışın rəmzi olan qar. Qaldığımız kotteclər istidir. Xidmət də normaldır. Qiymətlərdən heç bir narazılığımız yoxdur. Bir nəfərin bir günlük qalmaq xərci səhər yeməyi də daxil olmaqla 30 manat təşkil edir. Çox da baha deyildir, bizi qane edir. İstirahətimiz də çox yaxşı keçir”.