İstanbul, 23 sentyabr, Günel Karatepe, AZƏRTAC

İstanbulda Türk Dövlətləri Təşkilatına (TDT) üzv ölkələrin qış turizm mərkəzlərinin nümayəndələrinin toplantısı keçirilib.

AZƏRTAC xəbər verir ki, tədbirdə Azərbaycan (“Şahdağ” Turizm Mərkəzi), Türkiyə (Ulu Dağ), Özbəkistan (Amirsoy) və Qazaxıstanın (Şımbulak) dağ kurortları təmsil olunub.

Əvvəl türkdilli ölkələrin əməkdaşlıq sahələrini özündə əks etdirən videoçarx nümayiş olunub. Tədbirdə çıxış edən TDT-nin Baş katibinin müavini Mirvohid Əzimov yeni icraatın ölkələrimiz arasında əməkdaşlıq, o cümlədən turizm sahəsinin inkişafı baxımından əhəmiyyətini vurğulayıb.

Sonra TDT-nin Baş Katibliyi tərəfindən iştirakçı ölkələrə müraciət oxunub.

Müraciətdə deyilir ki, 2022-ci ildə Şamaxıda keçirilən VII Turizm Nazirləri toplantısında Azərbaycan qış turizminin inkişafı təşəbbüsünü irəli sürüb. Bu ilin əvvəlindən etibarən bu istiqamətdə başlayan fəaliyyət nəticəsində xizək mərkəzi və qış turizmi ilə bağlı anlaşma müqaviləsi imzalamağa qərar verilib. Anlaşmanın əsas məqsədi əməkdaşlığı artırmaq, təcrübə və bilik mübadiləsi, yeni texnologiyaların tətbiqi, xizək mərkəzlərində fəaliyyət göstərən işçi qüvvəsinin peşəkarlığını artırmaq, reklam kampaniyaları yaratmaq, yeni turist axını cəlb etmək üçün fərqli qış idman yarışları keçirmək, ortaq layihə çərçivəsində fərqli turizm mərkəzlərinin ortaq sistem üzərindən idarə olunması kimi fəaliyyətləri əhatə edir.

İttifaqın yaradılması ilə bağlı irəli sürdüyü təşəbbüs və fəaliyyətlərin sürətlənməsi üçün Azərbaycana xüsusi təşəkkürün ifadə edildiyi müraciətdə ittifaqa ilk sədrliyin Azərbaycana həvalə edildiyi bildirilib. Qarşıdan gələn iki il üçün “Şahdağ” Turizm Mərkəzinin sədri Rüstəm Nəcəfov Türk Dövlətlərinin Dağ Kurortları İttifaqının sədri, “Şahdağ”ın mətbuat katibi Orxan Bədəlov isə Baş katibi seçilib.

Sonra iştirakçı dövlətlərin nümayəndələri rəhbərlik etdikləri dağ kurortlarının potensialı və turist cəlbediciliyi baxımından imkanları ilə bağlı təqdimatla çıxış ediblər.

Tədbir çərçivəsində turizmin tərəqqisi fonunda dağ kurortlarının inkişafı, mərkəzlər arasında əməkdaşlıq əlaqələrinin inkişafı, iş birliyinin yaradılması, turist cəlbediciliyinin artırılması, birgə layihələrin hazırlanması, informasiya və təcrübə mübadiləsinin aparılması, eləcə də peşəkar mütəxəssislərin formalaşdırılması üçün təlim proqramlarının yaradılması, marketinq strategiyasının hazırlanması, birgə tədbirlərin keçirilməsi, vahid keçid kartlarının (ski pass) yaradılması, ittifaqın tərkibinin genişləndirilməsi və bir sıra digər məsələlər müzakirə olunub.

Görüşdə, həmçinin Türk Dövlətləri Təşkilatının “Türk baxışı-2040” və “Türk Dövlətlərinin 2022-2026-cı illər üçün İnkişaf Strategiyası”na əsasən türk dövlətlərində turizmin inkişafı ilə bağlı məsələlər ətrafında da fikir mübadiləsi aparılıb.

Sonda ittifaqın yaradılmasına dair mətnin imzalanma mərasimi keçirilib.