TÜRKİYƏNİN QARS ŞƏHƏRİNDƏ “XOCALI SOYQIRIMI” FOTOSƏRGİSİ AÇILMIŞDIR
Ankara, 9 avqust (AZƏRTAC). Azərbaycanın Qarsdakı baş konsulluğundan bildirmişlər ki, Qars valiliyinin qarşısında qurulmuş çadırda “Xocalı soyqırımı” fotosərgisinin açılışı olmuşdur.
Sərginin təşkilatçısı İğdır şəhərindəki Əsassız Erməni İddiaları ilə Mübarizə Dərnəyidir.
Dərnəyin sədri Göksəl Gülbəy ermənilərin Azərbaycan və Türkiyədə törətdikləri qətliamları əks etdirən sərginin Ankara, İstanbul və Van şəhərlərində də açılacağını bildirmişdir. Onun sözlərinə görə, sərginin eksponatları arasında Xocalı soyqırımını əks etdirən fotoşəkillərlə yanaşı, 1915-1918-ci illərdə Türkiyənin müxtəlif bölgələrində ermənilərin törətdikləri qətliamlardan bəhs edən kitab, jurnal, CD və broşürlər də vardır.
Sərginin eksponatlarına baxan qarslı qadınlar ermənilərin Xocalıda hamilə qadınların qarınlarını deşməsini, körpələrin gözlərini çıxarmasını, yaşlıların meyitlərini eybəcər hala salmasını əks etdirən fotoşəkillərdən dəhşətə gəldiklərini söyləmişlər.
Açılış mərasiminin iştirakçıları ermənilərin törətdikləri qətliamlardan bəhs edən sənədli filmə də baxmışlar. Sonra sərgi salonunun önündə “Qətliam törədənlərin mühakimə olunması üçün sən də bir işıq tut” şüarı yazılmış çadırda şamlar yandırılmış, erməni vəhşiliklərinin qurbanlarının ruhuna dualar oxunmuşdur.
Azərbaycanın Qarsdakı baş konsulu Ayxan Süleymanov və baş konsulluğun əməkdaşları da sərgi ilə tanış olmuşlar.
Oqtay Bayramov
AZƏRTAC-ın xüsusi müxbiri
Ankara
Bölmənin digər xəbərləri
