SİYASƏT
Türkiyənin son uğurları Prezident Ərdoğanın adı ilə bilavasitə bağlıdır
Bakı, 26 aprel, AZƏRTAC
Gücünü tarixindən alan qardaş Türkiyə dövləti son illər sürətlə inkişaf edərək regional və beynəlxalq güc mərkəzinə çevrilib. Beynəlxalq arenada baş verən geosiyasi vəziyyət fonunda Türkiyənin Avropada və dünyada siyasi-iqtisadi rolu durmadan artmaqdadır. Yaranmış vəziyyətdə Avropa üçün “mavi yanacaq” xüsusilə mühüm əhəmiyyət kəsb edir. Türkiyənin bir sıra Avropa ölkələri ilə qaz təchizatında uzunmüddətli saziş bağlaması gələcəkdə ölkəni Avropanın ən böyük qaz təchizatçısına çevirəcək. Eyni zamanda, Azərbaycanla Türkiyə arasında iqtisadi əlaqələrin genişlənməsi qardaş ölkənin bütövlükdə regiona geosiyasi baxışının formalaşmasına da böyük təsir göstərəcək.
Bu fikirləri AZƏRTAC-a açıqlamasında iqtisadçı-ekspert Rəşad Hüseyn söyləyib.
Ekspertin sözlərinə görə, Türkiyənin inkişafını Azərbaycanın da mühüm uğuru və inkişafı kimi səciyyələndirmək olar. Prezident İlham Əliyev və Prezident Rəcəb Tayyib Ərdoğanın dövründə Azərbaycan-Türkiyə münasibətləri tarixinin ən yüksək səviyyəsinə çatıb. Əlbəttə ki, hər bir siyasi iradənin arxasında iqtisadi güc dayanır. Həmçinin Prezident Ərdoğanın səyləri nəticəsində Türkiyənin türkdilli ölkələrlə münasibətləri ən yüksək səviyyədədir. Qardaş ölkənin son uğurları Prezident Rəcəb Tayyib Ərdoğanın adı ilə bilavasitə bağlıdır. 44 günlük Vətən müharibəsində Türkiyənin Azərbaycana verdiyi mənəvi dəstək nümunəsi dünyanın heç bir ölkəsində yoxdur. Eyni zamanda, Azərbaycanla Türkiyə arasında formalaşan siyasi dialoqun yüksək səviyyəsinə uyğun olaraq iqtisadi sahədə əməkdaşlıq da genişlənir. Enerji sektoru ölkələrimiz arasında əməkdaşlığın mühüm istiqamətini təşkil edir. Azərbaycan və Türkiyənin dost ölkələrlə birgə reallaşdırdıqları sonuncu enerji layihəsi Cənub Qaz Dəhlizidir.
“Türkiyə-Azərbaycan qardaşlıq və dostluq münasibətləri gələcəkdə də yüksək səviyyədə inkişaf edəcək, bu münasibət regionda davamlı sülhün və sabitliyin təminatçısı olacaqdır. Göründüyü kimi, Türkiyə ilə Azərbaycan arasında dostluq əlaqələri bu gün də davam və inkişaf edir. Hər iki dövlət dostluq münasibətlərini qoruyub saxlamaq və inkişaf etdirməkdə maraqlıdır. Azərbaycan qardaş Türkiyənin uğurlarına hər zaman sevinir. Prezident İlham Əliyevin dediyi kimi, Türkiyənin gücü Azərbaycanın gücü, Azərbaycanın gücü isə Türkiyənin gücüdür. Bizim qardaşlığımız əbədi və sarsılmazdır”, - deyə Rəşad Hüseyn vurğulayıb.