Ukraynalı uşaqlar Şəkinin tarixi məkanları və görməli yerləri ilə tanış olublar VİDEO
Şəki, 31 oktyabr, AZƏRTAC
Əmək və Əhalinin Sosial Müdafiəsi Nazirliyinin tabeliyindəki Sosial Xidmətlər Agentliyinin təşkilatçılığı ilə ölkəmizdə sosial-psixoloji reabilitasiya tədbirlərinə cəlb edilən 30 ukraynalı uşaq Şəkiyə səfər edib, bu qədim diyarın tarixi məkanları və görməli yerləri ilə tanış olublar.
AZƏRTAC-ın bölgə müxbirinin məlumatına görə, ukraynalı uşaqları və onları müşayiət edən müəllim qrupunu bu dəfə Xan sarayının həyətində 44 günlük Vətən müharibəsindən hamının xeyirxah əməlləri ilə tanıdığı Hikmət Musayev, yəni, Hikmət baba da qarşılayıb. Bu maraqlı görüşü izləyənlər arasında əməkdaşlarımız da olub.
Budur, iki dövlətin bayraqlarını əllərində tutan ukraynalı qonaqlar “Yuxarı Baş” Milli Tarix-Memarlıq Qoruğunun həyətinə daxil olur. Qoruq ərazisində, xüsusən Xan sarayının həyətində çox sayda qonaq olsa da, ukraynalı uşaqların gəlişi hamının diqqətini cəlb edir. Uşaqlar, onları müşayiət edən qrup rəhbərləri və komanda üzvləri bu tarixi abidənin möhtəşəmliyindən heyranlıqlarını gizlədə bilmirlər. Azərbaycana ilk dəfə gəldiklərini deyən yeniyetmə və uşaqlar getdikləri məkanlarda gülərüz qarşılandıqlarını, bütün qayğıları ilə maraqlandıqlarını, göstərilən diqqət və qayğının yüksək olduğunu bildiriblər.
Görüşə gələn Hikmət babanın qrup rəhbərinə iki dövlətin bayrağının əks olunduğu yun xalçanı təqdim etməsi, eləcə də hər bir iştirakçıya xüsusi hədiyyə verməsi alqışla qarşılanır.
Qrup rəhbəri Larisa Vaniyeva bildirir ki, O, Ukraynanın Sumı şəhərindən gəlib. “Müharibənin od-alovundan çıxmışıq. Bu çətin günlərdə bizim uşaqların gözəl Azərbaycanda istirahətinin təşkilini, terapiyalara cəlb olunmasını unuda bilmərik. Biz ukraynalılar Azərbaycan dövlətinin bu qayğısını unutmayacağıq. Bu gün Şəki şəhərində Hikmət baba ilə tanışlıq, onun uşaqlara hədiyyəsi isə hər birimizi qürurlandırdı. Əlimdə tutduğum bu bayrağı Hikmət babadan almaq bizə verilən ən böyük dəyər idi. Belə insanlar dünyamıza yaraşıq verir. Çünki onlar bizə mənəvi dayaq durur, hətta öz əmək təqaüdündən hədiyyələr alaraq bağışlayır. Bir daha göstərilən diqqətə görə hər kəsə təşəkkür edirik”, - deyə fikrini tamamlayır.
Uşaqlar və qrup rəhbərləri ilə xeyli söhbət edən, onlara mənəvi dəstək göstərən Hikmət baba bildirir ki, ukraynalılarla görüşmək onun çoxdankı arzusu idi. Hikmət baba qarşıdakı müddətdə də müharibənin od-alovundan çıxan ukraynalı uşaqlara öz əmək təqaüdündən kömək etməyə hazır olduğunu bildirir.
Sosial Xidmətlər Agentliyinin nümayəndəsi Nübar Gözəlovanın sözlərinə görə, bu proqramda müəyyən ekskursiyalar, turlar nəzərdə tutulub. Uşaqlar burada ekskursiyalarla yanaşı, sosial-psixoloji dəstək də alırlar. Bildirilib ki, 10 günlük sosial-psixoloji reabilitasiya proqramı həmin uşaqların emosional vəziyyətlərinin stabilləşməsinə, cəmiyyətə inteqrasiyalarının təmin edilməsinə dəstək məqsədi daşıyır.
Ümumilikdə indiyə kimi 300-ə yaxın ukraynalı uşaq ölkəmizə gətirilərək müvafiq xidmətlərlə təmin edilib.
Bölmənin digər xəbərləri
