“Ümumdünya Ətraf Mühit Günü” uşaqların gözü ilə
Bakı, 8 may, AZƏRTAC
Birləşmiş Millətlər Təşkilatı İnkişaf Proqramı və Azərbaycan Respublikası Ekologiya və Təbii Sərvətlər Nazirliyi 5 iyun Ümumdünya Ətraf Mühit Günü münasibətilə uşaqlar arasında rəsm müsabiqəsi elan edir.
BMT-nin Bakı ofisinin mətbuat xidmətindən AZƏRTAC-a bildirilib ki, “Məişət tullantılarının ətraf mühitə və insan sağlamlığına mənfi təsirini azaldaq!” mövzusunda keçiriləcək müsabiqə 7-10 yaşlı uşaqlar üçün nəzərdə tutulub.
Rəsmlər A3 formatında olmalı və mayın 25-də saat 18:00-dan gec olmayaraq BMT-nin Bakı ofisinə təqdim edilməlidir. Hər rəsmin arxa tərəfində müəllifin adı, soyadı, yaşı, əlaqə telefonu və təhsil aldığı məktəbi göstərilməlidir. Bu məlumatlar olmadan rəsmlər nəzərə alınmayacaq.
Müsabiqənin qaliblərinə mükafatlar təqdim ediləcək. Qaliblərin təltif edilmə mərasimi BMTİP və Ekologiya və Təbii Sərvətlər Nazirliyinin nümayəndələrinin iştirakı ilə iyunun 5-də keçiriləcək.
Bölmənin digər xəbərləri
