Ümummilli lider Heydər Əliyevin xatirəsini dünya azərbaycanlıları böyük ehtiramla yad etmişlər
Bakı, 13 dekabr (AZƏRTAC). Dünyanın müxtəlif ölkələrində yaşayan azərbaycanlılar ümummilli lider Heydər Əliyevin xatirəsini böyük ehtiramla yad etmişlər.
Rusiya Federasiyasının Moskva, Sankt-Peterburq, Yekaterinburq və digər şəhərlərində Ümumrusiya Azərbaycan Konqresi, Heydər Əliyev Fondunun Rusiya nümayəndəliyi və Rusiyanın Azərbaycanlı Gənclər Təşkilatının təşkilatçılığı ilə anma mərasimləri, “dəyirmi masa” və konfranslar keçirilmişdir.
Diasporla İş üzrə Dövlət Komitəsinin mətbuat xidmətindən AZƏRTAC-a bildirmişlər ki, bu tədbirlərdə ümummilli lider Heydər Əliyevin keçdiyi şərəfli ömür yolu barədə məlumat verilmiş, onun Azərbaycan xalqı və dövləti qarşısındakı misilsiz xidmətlərdən söz açılmışdır.
Ulu öndərin xatirəsini Ukrayna, Belarus, Estoniya, Litva, Latviya və Moldovadakı Azərbaycan diasporunun nümayəndələri də ehtiramla yad etmişlər.
Ümummilli liderin xatirəsinə həsr olunmuş anma mərasimləri Avropanın bir sıra ölkələrində, o cümlədən Almaniya, Fransa, İtaliyada, habelə Danimarka, İsveç, Niderland krallıqlarında, Polşa, Rumıniya, Macarıstan, Finlandiya, Çexiyada da keçirilmişdir.
Almaniyanın Berlin, Drezden və Maqdeburq şəhərlərində tədbir və konfranslar təşkil olunmuş və dünya miqyaslı siyasi xadim Heydər Əliyevin həyat və fəaliyyəti barədə məlumat verilmişdir. Drezdendə Almaniya-Azərbaycan Dostluq Cəmiyyətinin təşkilatçılığı ilə keçirilən tədbirdə qurumun rəhbəri Ağahüseyn Babayev Azərbaycanın ən yeni tarixinin böyük bir hissəsinin məhz ulu öndərin adı ilə bağlı olduğunu qeyd edərək vurğulamışdır ki, məhz Heydər Əliyevin dövlət quruculuğu sahəsində misilsiz xidmətlərinin məntiqi nəticəsi olaraq hazırda Azərbaycan demokratik, hüquqi, tolerant bir dövlətdir. Azərbaycanlılarla yanaşı yerli ictimaiyyətin nümayəndələri və digər milli icma təmsilçilərinin də iştirak etdiyi tədbirdə ümummilli lider Heydər Əliyevin xatirəsi bir dəqiqəlik sükutla yad olunmuş, ulu öndərin həyat və fəaliyyətindən bəhs edən sənədli film nümayiş etdirilmişdir.
Maqdeburqda Alman-Azərbaycan Mədəniyyət Cəmiyyətinin, Almaniyadakı Azərbaycan Diasporunun Mərkəzi Şurasının təşəbbüsü və Azərbaycanın Almaniyadakı səfirliyinin, Diasporla İş üzrə Dövlət Komitəsinin, Almaniyadakı Azərbaycanlıların Əlaqələndirmə Mərkəzinin dəstəyi ilə keçirilən tədbirdə həmin təşkilatların nümayəndələri ilə yanaşı digər xalqların nümayəndələri də iştirak etmişlər. Alman-Azərbaycan Mədəniyyət Cəmiyyətinin sədri Yaşar Millnits-Niftəliyev ümummilli lider Heydər Əliyevin həyat yolu, Azərbaycanın inkişafı üçün göstərdiyi xidmətlər barədə məruzə ilə çıxış etmişdir.
Azərbaycanın ümummilli lideri Heydər Əliyevin xatirəsinə həsr olunmuş anım mərasimi Türkiyənin paytaxtı Ankarada da keçirilmişdir. İki yüzədək qonağın iştirak etdiyi tədbirdə Azərbaycanın dövlət rəsmiləri, Milli Məclisin deputatları, eləcə də Türkiyə hökumətinin və parlamentinin üzvləri, diaspor nümayəndələri, ictimai-siyasi xadimlər iştirak etmişlər. Tədbirin iştirakçıları Ankaradakı Heydər Əliyev parkında ulu öndərin abidəsi önünə əklil qoyduqdan sonra anım mərasimi Şaraton otelində davam etdirilmişdir.
Birləşmiş Ərəb Əmirliklərində ulu öndər Heydər Əliyevin xatirəsinə həsr olunmuş simpozium keçirilmişdir. BƏƏ-də fəaliyyət göstərən Azərbaycan Cəmiyyətinin təşkilatçılığı ilə Dubayda təşkil olunmuş tədbirdə ölkədə yaşayan azərbaycanlılar, hökumət nümayəndələri, türk, ərəb və digər xalqların diaspor təşkilatlarının təmsilçiləri iştirak etmişlər.
Mərasimdə çıxış edən Cəmiyyətin sədri Samir İmanov ümummilli lider Heydər Əliyevin xalqının müstəqilliyi, suverenliyi, tərəqqisi uğrunda ağır mübarizə şəraitində keçən ömür yolundan bəhs etmişdir.
Azərbaycan xalqının ümummilli lideri Heydər Əliyevin xatirəsinə həsr olunmuş anma mərasimləri Gürcüstan, Özbəkistan, Qazaxıstan, Qırğızıstanda yaşayan azərbaycanlılar tərəfindən də keçirilmişdir. Tədbirlərdə azərbaycanlılarla yanaşı yerli ictimaiyyətin nümayəndələri, habelə ictimai-siyasi xadimlər iştirak etmişlər.
İsraildə ulu öndərin xatirəsinə həsr olunmuş konfransda Heydər Əliyev Azərbaycan dövlətinin memarı və qurucusu kimi səciyyələndirilmiş, Azərbaycanın bu gün qazandığı nailiyyətlərin ulu öndərin müdrikliyinin, onun apardığı siyasətin bəhrəsi olduğu xüsusi vurğulanmışdır. Tədbirdə ümummilli liderin həyat və fəaliyyətindən bəhs edən sənədli film nümayiş etdirilmişdir.
Azərbaycanın ümummilli lideri Heydər Əliyevin xatirəsinə həsr olunmuş anma mərasimləri ABŞ, Kanada, Avstraliya və Yeni Zelandiyada da keçirilmiş, ulu öndərin xatirəsi bir dəqiqəlik sükutla yad edilmiş, onun Azərbaycan dövləti qarşısındakı misilsiz xidmətləri qeyd olunmuşdur.
Bölmənin digər xəbərləri
