UNEC 95: İnamla gələcəyə doğru
Bakı, 10 iyun, AZƏRTAC
Azərbaycan Dövlət İqtisad Universiteti (UNEC) bu il özünün 95 illik yubileyini qeyd edir. Bu, təkcə bir təhsil ocağının yaşı deyil, həm də Azərbaycanın iqtisadi və elmi-mədəni inkişafına verdiyi 95 illik töhfənin rəmzidir.
AZƏRTAC xəbər verir ki, bu fikirlər UNEC Rus İqtisad Məktəbinin direktoru, Koqnitiv İqtisadiyyat Elmi Mərkəzinin rəhbəri dosent Mənsur Bərxudarovun “UNEC 95: İnamla gələcəyə doğru” sərlövhəli
məqaləsində yer alıb. Məqaləni təqdim edirik.
Yubiley keçmişə nəzər salmaqla yanaşı, həm də gələcəyə inamla baxmaq üçün bir fürsətdir. Məhz bu məqsədlə “UNEC-100” İnkişaf Strategiyası hazırlanıb və uğurla icra olunur. Strategiyada müəyyən edilən 7 məqsəd və 31 hədəf universitetin beynəlxalq arenada tanınan, rəqabətədavamlı ali təhsil müəssisəsinə çevrilməsinə yönəlib.
İlk olaraq, UNEC-in əsas məqsədlərindən biri onu yüksəkkeyfiyyətli təhsil ocağına çevirməkdir. Bu məqsədlə abituriyentlərlə informasiya-təbliğat işi aparılır, orta məktəblərlə əməkdaşlıq genişləndirilir və universitetin üstünlükləri yüksək bal toplayan abituriyentlərə daha yaxından təqdim olunur. Bu fəaliyyətin nəticəsi olaraq 2024-cü ildə 600-dən çox bal toplayaraq UNEC-ə qəbul olan tələbələrin sayı 2023-cü illə müqayisədə 89.4 faiz artaraq 409 nəfərə çatıb. Paralel olaraq ixtisaslar və tədris proqramları əmək bazarının tələblərinə və beynəlxalq standartlara uyğunlaşdırılır, dərslər interaktiv üsullarla keçirilir, təhsilin informasiya təminatı gücləndirilir, beynəlxalq akkreditasiyalar həyata keçirilir, xarici professorların iştirakı ilə ustad dərsləri təşkil olunur və tələbə mübadiləsi proqramları genişləndirilir.
Digər əsas məqsədlərdən biri UNEC-i tədqiqatyönümlü universitetə çevirməkdir. Bu məqsədlə universitetdə müxtəlif sahələr üzrə 47 elmi-tədqiqat mərkəzi fəaliyyət göstərir. Həmin mərkəzlərdə elmi potensialın gücləndirilməsi, beynəlxalq reytinqli jurnallarda məqalələrin çapı, müəllimlərin H-indeksinin artırılması istiqamətində mühüm nəticələr əldə olunur. Elmi fəaliyyətin stimullaşdırılması məqsədilə daxili qrant müsabiqələri elan olunub, artıq üçüncü qrant müsabiqəsi həyata keçirilib.
Universitetin inkişaf xəttində digər bir prioritet – sahibkar universitet modelinə keçiddir. UNEC tələbə və müəllimləri innovativ düşüncəyə təşviq edir, startap layihələrinin və patent müraciətlərinin sayının artırılması məqsədilə təlimlər təşkil olunur, biznes sektoru ilə birgə tədqiqat layihələri həyata keçirilir.
UNEC-in sosial məsuliyyətli universitet olaraq cəmiyyətdə aktiv iştirakı da strateji məqsədlərdən biridir. Sosial layihələrin həyata keçirilməsi, xüsusilə yaşıl iqtisadiyyatla bağlı beynəlxalq konfransların təşkili və ictimai məsələlərə dair aktiv mövqe bu sahədəki uğurları tamamlayır.
Universitetin beynəlmiləlləşməsi istiqamətində də əhəmiyyətli addımlar atılır. Məqsəd 2030-cu ilə qədər qəbul edilən tələbələr arasında əcnəbilərin payını 10 faizə çatdırmaq, beynəlxalq mübadilə proqramlarını, ikili diplom layihələrini və ingilis dilində tədris olunan proqramları artırmaqdır. Bu istiqamətdə Türk dünyası ölkələri – Türkiyə, Qazaxıstan, Özbəkistanla təhsil əlaqələri intensiv şəkildə inkişaf etdirilir.
UNEC-də idarəetmə sisteminin müasirləşdirilməsi və çevik modelə keçid də strateji məqsədlər sırasındadır. Bu məqsədlə strateji idarəetmə sistemi tətbiq olunur, informasiya texnologiyalarına əsaslanan idarəetmə yanaşmaları və rəqəmsal bacarıqlara malik insan kapitalı formalaşdırılır.
Növbəti strateji məqsəd isə UNEC-in yüksək beynəlxalq reytinqli universitetlər sırasında yer almasıdır. Məqsəd UNEC-in 100 illik yubileyində universitetin dünyanın ən nüfuzlu 500 universiteti siyahısında olmasıdır.
Bu baxış fonunda UNEC-in tərkibində fəaliyyət göstərən Rus İqtisad Məktəbi (RESH) də beynəlxalq xarakter daşıyan xüsusi strukturlardan biridir. 2016-cı ildə yaradılan bu təhsil mərkəzi 2017-ci ildən etibarən Rus İqtisad Məktəbi adı ilə fəaliyyət göstərir. Hazırda burada 10 ixtisas üzrə bakalavriat və magistratura səviyyəsində təhsil verilir. Məktəb yaranandan bəri 3000-dən çox yüksəkixtisaslı məzun yetişdirib. Hazırda isə burada 1500 tələbə təhsil alır və onların 100-dən çoxu əcnəbi vətəndaşlardır. Əcnəbi tələbələr əsasən Ukrayna, Rusiya, Qazaxıstan, Özbəkistan, Türkmənistan, Gürcüstan və İsrail vətəndaşlarıdır.
Rus İqtisad Məktəbi, eyni zamanda, 30-dan çox xarici universitetlə əməkdaşlıq edir. İkili diplom və akademik mobillik çərçivəsində həm UNEC tələbələri xaricdə təhsil alır, həm də xarici tələbələr bu məktəbdə bilik və bacarıqlarını artırırlar. Xarici professorların UNEC-də mühazirə və seminar keçməsi, eyni zamanda, yerli müəllimlərin beynəlxalq təcrübə imkanlarından yararlanması bu əməkdaşlığın vacib nəticələrindəndir. Eyni zamanda, məktəbdə beynəlxalq və yerli elmi tədbirlər, konfranslar təşkil olunur ki, onların əksəriyyəti praktiki əhəmiyyət daşıyır.
Nəticə etibarilə, UNEC və onun struktur bölmələri, o cümlədən Rus İqtisad Məktəbi dinamik inkişaf edən, dünya elmi və təhsil sisteminə sürətlə inteqrasiya olunan, Azərbaycanın rəqəmsal cəmiyyətinə və milli iqtisadiyyatına xidmət edən güclü bir təhsil mərkəzidir. Məqsədimiz UNEC brendinin dünya universitetləri sırasında mövqeyini daha da möhkəmləndirmək və gələcəyin vətənpərvər, yüksəkixtisaslı kadrlarını yetişdirməkdir.
Bu gün Azərbaycan Dövlət İqtisad Universiteti 95 illik zəngin tarixi və ənənələri ilə ölkəmizin ali təhsil sistemində aparıcı rolunu möhkəmləndirir, innovativ yanaşmaları və inkişaf strategiyaları ilə gələcəyə inamla addımlayır.
Bölmənin digər xəbərləri
