Vətən sizə əmanət, qürurlu Azərbaycan gəncliyi!
Bakı, 13 yanvar, AZƏRTAC
Bir aydan artıqdır ki, əsasən, gənclərdən ibarət olan azərbaycanlı ekofəallar Laçın-Xankəndi yolu üzərində dinc etiraz aksiyasını davam etdirirlər. Son günlər havanın sərt-qarlı, şaxtalı keçməsi də gənclərimizi qorxutmur və onları tutduqları haqq yolundan çəkindirə bilmir. Gənclərimizin bu mərdliyi mənə 2020-ci ildə baş vermiş Tovuz hadisələrini və həmin il sentyabrın 27-də Ermənistan silahlı qüvvələrinin genişmiqyaslı təxribat əməllərini xatırlatdı. Həmin günlərdə minlərlə gənc ayağa qalxaraq Səfərbərlik və Hərbi Xidmətə Çağırış üzrə Dövlət Xidmətinin rayon şöbələrinə üz tutdular və könüllü olaraq cəbhəyə gedib düşmənə divan tutmağa hazır olduqlarını bildirdilər. İkinci Qarabağ döyüşlərində qırx dörd gün ərzində düşməni diz çökdürən Silahlı Qüvvələrimizin əksəriyyətinin gənclərdən ibarət olması və onların sinələrini sipər edərək Vətənin bir qarış torpağını da düşmənə verməməsi hər birimizdə qürur hissi yaradıb. Bu gün Laçın-Xankəndi yolunda böyük fədakarlıq göstərən gənclərimiz düşmənə yenə də göz dağı verirlər.
Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.
O deyib ki, gənclərimiz artıq öz məqsədlərinə nail olurlar. Yəni aksiya keçirdikləri müddətdə Xankəndiyə Ermənistandan silah-sursat daşınmasının qarşısı alınıb. Həmçinin xalqımıza məxsus təbii sərvətlərin-Qarabağda qanunsuz şəkildə hasil edilən əlvan metal filizlərinin emal üçün Ermənistana göndərilməsi mümkünsüz olub. Xankəndidə yaşayan mülki ermənilər istəklərinin yerinə yetirilməsi üçün azərbaycanlılara müraciət etməsi separatçıların olan-qalan ümidlərini də məhv edib. Çünki artıq beynəlxalq ictimaiyyətə də bəlli olur ki, azərbaycanlı ekofəalların, könüllülərin keçirdikləri aksiya humanitar məqsədlidir və mülki əhaliyə qarşı hər hansı qərəzli niyyət yoxdur. Xalqımız belə gənclərlə fəxr edir və qürur duyur. Vətən sizə əmanətdir, qəhrəman gənclərimiz.
Ə.Bədəlov bir neçə gün əvvəl Prezident İlham Əliyevin yerli televiziya kanallarına müsahibəsində də bu məsələni xüsusi vurğuladığını diqqətə çatdıraraq deyib: “Dövlətimizin başçısı qışın soyuğunda səhərə qədər qarın-şaxtanın altında dayanan həmin gənclərə “Eşq olsun!” dedi və bildirdi ki, onlar bizim fəxrimizdir. Prezident İlham Əliyevin dediyi kimi, gənclərimiz öz haqlarını tələb edirlər. Bu mərdlik, şücaət Azərbaycan gəncinin nə qədər yüksək keyfiyyətlərə malik olmasını, vətənpərvərliyini, qəhrəmanlığını və Vətənin hər qarış torpağından ötrü canından keçməyə hazır olduğunu bütün dünyaya göstərdi. Dünya ictimaiyyəti bir daha Ermənistanın yalanlarının şahidi olur. Həm erməni ideoloqları, həm də onların havadarları dünyaya sübut etmək istəyirlər ki, guya, Azərbaycan tərəfi Xankəndidə yaşayan erməniləri blokadaya alıblar. Halbuki, aksiya keçirilən 30 gündən artıq müddətdə sülhməramlıların dörd yüzə yaxın yük avtomobili həmin ərazidən keçib”.
Siyasi şərhçi bildirib ki, artıq İran avtomobilləri də humanitar yardım adı ilə Ermənistana silah-sursat, narkotik maddələr daşıya bilmirlər. Prezident İlham Əliyev də bunu diqqətə çatdırıb. Dövlət başçımız İran maşınlarının erməni separatçılarına yanacaq daşıdıqlarını xatırladıb. Hətta İran maşınları üzərinə saxta erməni nömrələri yapışdırmaqla xalqımızı, həmçinin beynəlxalq ictimaiyyəti aldatmaq istəyirdi. İndiyə qədər 20-yə yaxın İran vətəndaşının Xankəndiyə qanunsuz girmələri, Laçın-Xankəndi yolundakı özbaşınalığın təsdiqi idi. Hazırda bunların hamısının qarşısı alınıb. Xankəndidə yaşayan ermənilər, tədricən ümidlərini Azərbaycana bağlayırlar. Yaxşı görürlər və hiss edirlər ki, Ruben Vardanyan kimilərindən onlara arxa-dayaq olmayacaq. Çünki Vardanyanın məqsədi artıq uşaqdan-böyüyə hər kəsə məlumdur. O, özünün şəxsi maraqları naminə Xankəndiyə gəlib və havayı yerə pul xərcləmir. Yalnız qeyri-qanuni aksiyalar keçirilən zaman daha çox iştirakçı cəlb etmək üçün cüzi miqdarda pul xərcləməli olur.
Ə.Bədəlov deyib ki, dövlətimizin başçısı Qarabağda Azərbaycan bayrağı altında yaşamaq istəyən ermənilər üçün şərait yaradılacağını dəfələrlə vurğulayıb. Azərbaycan vətəndaşları kimi, onların hüquqları da, təhlükəsizliyi də təmin olunacaq. Ona görə Laçın-Xankəndi yolunda ekofəalların aksiya keçirmələrinə blokada demək, ədalətsizlikdir. Gənclərimiz haqq-ədalət uğrunda mübarizə aparırlar. İnanırıq ki, Vətən müharibəsində qazandığımız tarixi Qələbə xalqımızı qələbədən-qələbəyə aparacaq.
Bölmənin digər xəbərləri
