“Vətəndaş Cəmiyyəti Uğrunda” Seçki Müşahidə Koalisiyası beynəlxalq təşkilatlara hesabat təqdim edib
Bakı, 28 avqust, AZƏRTAC
“Vətəndaş Cəmiyyəti Uğrunda” Seçki Müşahidə Koalisiyası sentyabrın 1-də Azərbaycan Respublikasının Milli Məclisinə keçiriləcək növbədənkənar seçkilərin müşahidəsi ilə əlaqədar aralıq hesabatını beynəlxalq təşkilatlara və diplomatik nümayəndəliklərə təqdim edib. Aralıq hesabat Koalisiyanın sosial şəbəkə hesablarında ingilis dilində yerləşdirilib və beynəlxalq auditoriya üçün əlçatandır.
AZƏRTAC xəbər verir ki, hesabat, həmçinin ATƏT-in Demokratik Təsisatlar və İnsan Hüquqları Bürosunun müşahidə missiyasına təqdim edilib. Aralıq hesabatda seçkiqabağı mühit, namizədlərin irəli sürülməsi, imza toplama mərhələsi və namizədlərin qeydiyyatı, seçki siyahılarının dəqiqləşdirilməsi, seçkiqabağı təşviqatın ilk həftəsi ilə bağlı dəyərləndirmə əks olunub. Bundan əlavə, hesabatda namizədlərin gender və yaş göstəriciləri, vətəndaş cəmiyyətini, bələdiyyələri təmsil edən namizədlər haqqında ətraflı təhlil verilib. Sənəddə, həmçinin Koalisiyanın tövsiyələri əks olunub.
Koalisiya, eyni zamanda, səsvermə günündən sonra ilkin, daha sonra isə yekun hesabatla çıxış edəcək.
Qeyd edək ki, “Vətəndaş Cəmiyyəti Uğrunda” Seçki Müşahidə Koalisiyası Milli Məclisə növbədənkənar seçkilərin müşahidəsini həyata keçirəcək. Koalisiya “Bələdiyyələrin fəaliyyətinin təbliği” İctimai Birliyi, Hüquqi Təhlil və Araşdırmalar İctimai Birliyi və “Prioritet” Sosial-İqtisadi Araşdırmalar Mərkəzi İctimai Birliyi tərəfindən yaradılıb. “Vətəndaş Cəmiyyəti Uğrunda” Seçki Müşahidə Koalisiyasının məqsədi seçki prosesində şəffaflığın, hesabatlılığın, inklüzivliyin təmin edilməsi, namizədlərin qeydiyyatı, təşviqat kampaniyasının aparılması, səsvermə günü səslərin hesablanması və şikayətlərə baxılması, seçki administrasiyasının fəaliyyəti, seçki mühiti və beynəlxalq standartlar və qabaqcıl təcrübənin nəzərə alınması məsələləri ilə əlaqədar bütün maraqlı tərəfləri müstəqil, obyektiv qiymətləndirmə ilə təmin etməkdir.
Koalisiya işğaldan azad edilmiş ərazilər və Naxçıvan Muxtar Respublikası daxil olmaqla ölkə üzrə 75 seçki dairəsində 500 müşahidəçi vasitəsilə müşahidə aparacaq. Müşahidəçilərin əksəriyyəti QHT üzvləri, fəalları və könüllüləridir. Koalisiya aralıq və yekun hesabat hazırlayacaq, hesabatlar ingilis dilində beynəlxalq auditoriya üçün də əlçatan olacaq.
Bölmənin digər xəbərləri
