VİLNÜS ENERJİ TƏHLÜKƏSİZLİYİ KONFRANSI
Xəbər verdiyimiz kimi, oktyabrın 10-da Azərbaycan Prezidenti İlham Əliyev Vilnüsdə energetika sahəsində təhlükəsizlik məsələlərinə həsr edilmiş “Məsul tərəfdaşlar üçün məsul energetika” mövzusunda konfransın işində iştirak etmişdir.
Litvanın Xarici İşlər Nazirliyi, Strateji Araşdırmalar Mərkəzi və ABŞ-ın Hadson İnstitutu tərəfindən təşkil edilmiş ikigünlük konfransda energetika sahəsində beynəlxalq təhlükəsizlik problemləri və Avropa İttifaqının energetika sahəsində xarici siyasətinin əsas istiqamətləri ilə bağlı məsələlər müzakirə edilmişdir. Forum iştirakçıları energetika sahəsində Transatlantik dialoq, Aİ-nin Rusiya, Xəzər dənizi və Qara dəniz regionları ilə energetika sahəsində əməkdaşlığı, Baltikyanı ölkələrin enerji strategiyasının inkişafı məsələlərini də nəzərdən keçirmişlər. Konfrans çərçivəsində energetika müəssisələri təmsilçilərinin və ekspert-energetiklərin iştirakı ilə “Enerji təhlükəsizliyi: satış, tələbat və şaxələndirmə” mövzusunda xüsusi beynəlxalq forum da keçirilmişdir.
Konfransın işinin ilk günü başa çatandan sonra Azərbaycan Prezidenti İlham Əliyev, Ukrayna Prezidenti Viktor Yuşşenko, Gürcüstan Prezidenti Mixail Saakaşvili, Litva Prezidenti Valdas Adamkus, Polşa Prezidenti Lex Kaçinski və Qazaxıstanın energetika və mineral ehtiyatlar naziri Sauat Mınbayevin iştirakı ilə çoxtərəfli sənədlər imzalandı.
Energetika sahəsində əməkdaşlıq haqqında müqaviləni Azərbaycan, Gürcüstan, Litva, Polşa və Ukraynanın energetika nazirləri imzaladılar. “Sarmatiya” dövlətlərarası məhdud məsuliyyətli cəmiyyətinin yaradılması barədə müqaviləni Azərbaycan, Litva, Gürcüstan, Polşa və Ukrayna neft şirkətlərinin rəhbərləri imzaladılar.
Sonra Azərbaycan Prezidenti İlham Əliyev Vilnüsdə 2007-ci il oktyabrın 10-da keçirilmiş enerji təhlükəsizliyi konfransı barədə prezidentlərin Kommunikesini oxudu.
(Kommunikenin mətni qəzetin 12 oktyabr nömrəsində dərc olunmuşdur).
Daha sonra dövlət başçıları mətbuat konfransı keçirərək, KİV nümayəndələri qarşısında bəyanatlarla çıxış etdilər.
Litva Prezidenti Valdas Adamkus imzalanan sazişləri enerji sahəsində irəliyə doğru tarixi addım kimi qiymətləndirdi. Gürcüstan Prezidenti Mixail Saakaşvili, Polşa Prezidenti Lex Kaçinski, Ukrayna Prezidenti Viktor Yuşşenko və Qazaxıstanın energetika və mineral ehtiyatlar naziri Sauat Mınbayev konfransda müzakirə olunan məsələlərin və imzalanan sazişlərin əhəmiyyətindən, Odessa-Brodı-Plotsk-Qdansk neft kəmərinin Xəzər regionundan enerji daşıyıcılarının Avropaya nəql edilməsində, bu yolla da enerji təhlükəsizliyinin təmin olunmasında rolundan danışdılar. Dövlət başçıları GUAM sammitinin və enerji təhlükəsizliyinə dair konfransın keçirilməsi üçün yaradılan şəraitə görə Litva Prezidentinə minnətdarlıqlarını bildirdilər.
Bölmənin digər xəbərləri
