Xəyal Bəşirov: Azərbaycan qlobal problemlərin həlli istiqamətində təşəbbüslər ortaya qoyur
Bakı, 4 aprel, AZƏRTAC
Azərbaycanın müstəqillik tarixinə nəzər yetirsək, bir sıra ciddi məqamların şahid olarıq. Ümumiyyətlə, Sovet İttifaqının süquta uğradığı və ölkəmizin dövlət müstəqilliyini yenidən əldə etməyə başladığı 1988-ci ildə Azərbaycanda meydan hərəkatı başladı. 1987-ci ildə Ulu Öndər Heydər Əliyev Moskvadakı bütün vəzifələrini itirdikdən sonra ermənilər Azərbaycana qarşı uzun illər ərzində planlaşdırdıqları məkrli, hiyləgər niyyətlərini həyata keçirməyə başladılar.
Bunu AZƏRTAC-a açıqlamasında Siyasi və Hüquqi Araşdırmalar Mərkəzinin rəhbəri politoloq Xəyal Bəşirov deyib.
Onun sözlərinə görə, Azərbaycanın müxtəlif şəhərlərində, rayonlarında xalqa qarşı törədilən vəhşiliklər, cinayətlər, xalqın gözünün qorxudulması ərazilərimizin işğal edilməsinə hesablanmış addımlar idi. Ümummilli Lider Heydər Əliyev Azərbaycan Kommunist Partiyasının Birinci katibi işlədiyi müddətdə ermənilərin Bakıda, Sumqayıtda və digər ərazilərimizdə, xüsusilə, Qarabağ ərazisində törətməyə çalışdıqları cinayətlərin qarşısı dəfələrlə alınmışdı. Heydər Əliyevin Moskvada yüksək vəzifəyə təyin edilməsi təbii ki, ermənilərin ürəyincə deyildi. Ulu Öndər vəzifəsindən getdikdən sonra M.Qorbaçovun iqtisadi müəssisələr üzrə müşaviri olan erməni Aqanbekyan artıq Azərbaycana qarşı ərazi iddiaları səsləndirməyə başladı. O, 1987-ci ildə Fransada "Humanite" qəzetinə verdiyi müsahibəsində bəyan etdi ki, Dağlıq Qarabağı Ermənistana birləşdirmək lazımdır.
Politoloq vurğulayıb ki, Azərbaycan xalqı çox ağır bir dönəmdə öz mövqeyini ortaya qoydu. Ulu Öndər Heydər Əliyev 1993-cü ildə xalqın tələbi ilə Azərbaycana rəhbərlik etməyə başladı. Təbii ki, ciddi şəkildə zəifləmiş, işğala, soyqırımına məruz qalmış və yeni müstəqilliyini qazanmış Azərbaycan dövlətinin gücdən düşməsi, parçalanmaqla qarşı-qarşıya olması çox ciddi problemlərə gətirib çıxarmışdı. Ümummilli Lider Heydər Əliyev bu problemlərin həllinə nail olmaq üçün bütün səylərini, təcrübələrini ortaya qoydu. Heydər Əliyev siyasətinin layiqli davamçısı Prezident İlham Əliyevin bu il hakimiyyətə gəlməsinin 20 ili tamam olacaq. Ötən müddət ərzində Azərbaycan müstəqil, rəqabətədavamlı, güclü ölkəyə çevrilib, ölkəmiz nəinki bölgənin, Avropa regionunun, Türk dünyasının ulduzuna çevrilib. Bütün bunlar onu deməyə əsas verir ki, sükan etibarlı əllərdədir.
“Prezident İlham Əliyevin yürütdüyü siyasət nəticəsində Azərbaycan heç vaxt olmadığı kimi güclü, inkişaf etmiş hərbi və siyasi cəhətdən irəliyə getmiş ölkəyə çevrilib. Biz dünya dövlətləri arasında nüfuzu artan güclü dövlətin vətəndaşı olduğumuzu hiss edirik. Bu gün Azərbaycan dünyanın ən çox təşkilatlanmış regionu olan Avropanın enerji və iqtisadi təhlükəsizliyinin təminatı prosesində aktiv rol oynayır. Azərbaycan bəlkə də hazırda dünya üçün yeganə olan Orta Dəhliz kimi işlək dəhlizi təqdim edir. Bu proseslərin reallaşdırılması istiqamətində bütün səy və bacarıqlarını səfərbər edən Azərbaycan ayrı-ayrı beynəlxalq təşkilatlarda çox ciddi nüfuza sahib olan dövlətə çevrilib. Azərbaycan qlobal problemlərin həlli istiqamətində təşəbbüslər ortaya qoyur. Bu da Azərbaycan dövlətinin və rəhbərinin yürütdüyü praqmatik xarici siyasət və uğurlu diplomatiyanın məntiqi nəticəsidir”, - deyən Xəyal Bəşirov fikirlərini yekunlaşdırıb.
Bölmənin digər xəbərləri
