Xocalı soyqırımı qurbanlarının xatirəsi Bişkekdə yad edilib
Bakı, 24 fevral, AZƏRTAC
Fevralın 24-də Mərkəzi Asiyanın Tərəqqipərvər Azərbaycanlıları Birliyi tərəfindən Bişkekdə yeni açılmış Azərbaycan bazar günü məktəbində Xocalı soyqırımının 31-ci ildönümü ilə bağlı anım tədbiri keçirilib.
Azərbaycanın Qırğızıstandakı səfirliyindən AZƏRTAC-a bildiriblər ki, tədbirdə Azərbaycan diasporunun nümayəndələri, səfir Lətif Qəndilov, “Кыргызтест” dövlət müəssisəsinin direktoru Batma Bolotalieva, Prezident yanında dil üzrə milli komissiyanın rəhbəri Jıldız Orozbekova iştirak ediblər.
Əvvəlcə iştirakçılar Xocalı soyqırımı qurbanlarının xatirəsini bir dəqiqəlik sükutla yad edib, faciə ilə bağlı fotosərgiyə baxış keçiriblər.
Tədbirdə çıxış edən səfir Lətif Qəndilov Xocalı soyqırımı haqqında iştirakçılara ətraflı məlumat verib, bu qətliamın səbəblərindən danışıb. Diplomat qeyd edib ki, Xocalı faciəsinin əsas xüsusiyyəti ermənilər tərəfindən ciddi düşünülmüş, hazırlanmış, silahsız, çarəsiz azərbaycanlılara qarşı yönəlmiş soyqırımı əməliyyatı olmasıdır. Çünki bu qətliam zamanı ermənilər nə qocalara, nə qadınlara, nə də uşaqlara rəhm etməyiblər. Bu soyqırımında Ermənistanın sabiq prezidentləri Serj Sarkisyan, Robert Köçəryan, keçmiş müdafiə naziri Seyran Ohanyan, erməni millətçiliyinin lideri Zori Balayan birbaşa iştirak ediblər. Ölkəmiz və xalqımız günahsız insanlarının qanının yerdə qalmaması üçün artıq beynəlxalq məhkəmələrə müraciət edir və bu istiqamətdə ciddi iş aparılır. Bizim əsas borcumuz soyqırımı qurbanlarının xatirəsini unutmamaqdır.
Səfir çıxışında Azərbaycan xalqının və rəhbərliyinin Ermənistanla sülh müqaviləsi bağlamağa hazır olduğu halda, Ermənistanın müxtəlif bəhanələrlə sülh prosesindən yayınmasından, Laçın koridorunda ermənilər tərəfindən azərbaycanlılara qarşı təxribatların həyata keçirilməsindən, Qarabağda təbii ehtiyatların qanunsuz istismar edilməsindən, ekoloji soyqırımının həyata keçirilməsindən, ermənilərin məkrli planlarından, Azərbaycan Prezidenti İlham Əliyevin bu əməllərə qarşı gördüyü tədbirlərdən danışıb.
Tədbirdə Qırğızıstanın Gimnastika Federasiyasının prezidenti Əsəd Əsədov, Qırğızıstan Prezidenti yanında Əfv Komissiyasının üzvü, Əməkdar hüquqşünas Aydın Alaferdov, Prezident yanında dil üzrə milli komissiyanın rəhbəri Jıldız Orozbekova çıxışlarında Ermənistanın törətdiyi vəhşiliklərə etirazlarını bildirib, Türk Dövlətləri Təşkilatının möhkəmlənməsinin vacibliyini vurğulayıb, Azərbaycanın mühüm uğurlar qazanmasında Prezident İlham Əliyevin misilsiz xidmətlərindən danışıblar.
Sonda səfir L.Qəndilov tədbirin təşkilinə görə Mərkəzi Asiyanın Tərəqqipərvər Azərbaycanlıları Birliyinin rəhbəri Xansıvar Baxşəliyevə təşəkkürünü bildirib.
Xatırladaq ki, Lətif Qəndilovun Xocalı soyqırımının 31-ci ildönümü ilə bağlı Qırğızıstanın “Вечерний Бишкек” qəzetində “Xocalı faciəsi qurbanlarının xatirəsi Azərbaycanda və digər ölkələrdə yad olunur” sərlövhəli məqaləsi dərc edilib.
Bölmənin digər xəbərləri
