Xorvat nazir: Heydər Əliyevin idarəçiliyi sayəsində Azərbaycan beynəlxalq birliyin etibarlı tərəfdaşına çevrilib
Bakı, 5 may, AZƏRTAC
Azərbaycanın Xorvatiyadakı səfirliyi tərəfindən Zaqreb şəhərində Ulu Öndər Heydər Əliyevin anadan olmasının 100-cü ildönümü münasibətilə musiqili tədbir keçirilib.
AZƏRTAC xəbər verir ki, Azərbaycanın Xorvatiyadakı səfiri Anar İmanov tədbirdə çıxış edərək, Ulu Öndər Heydər Əliyevin Azərbaycan tarixində müstəsna rolundan danışıb, onun müdrik siyasəti və uzaqgörənliyi sayəsində xalqımızın milli dövlətçilik ideyasını həyata keçirməyə, müasir və güclü Azərbaycan dövləti qurmağa, müstəqillik arzularını gerçəkləşdirməyə nail olduğunu bildirib. Ulu Öndərin Azərbaycanın müstəqilliyinin bərpasında, gücləndirilməsində və dövlətçiliyimizin qorunub saxlanmasındakı roluna toxunan səfir onun tariximizin çətin dövründə hakimiyyətə gəldiyini, müstəqilliyimizi xilas etdiyini söyləyib
Diplomat Ümummilli Lider Heydər Əliyevin siyasi kursunun onun layiqli davamçısı Prezident İlham Əliyev tərəfindən uğurla davam etdirildiyini bildirərək, Ali Baş Komandanın rəhbərliyi ilə müzəffər Azərbaycan Ordusunun əzəli torpaqlarımızı azad etdiyini, bu böyük Qələbənin məhz Ulu Öndər Heydər Əliyevin zamanında atılmış mühüm addımların nəticəsində qazanıldığını vurğulayıb.
Xorvatiyanın sabiq Prezidenti İvo Yosipoviç çıxışında Heydər Əliyevi dünyaşöhrətli siyasi xadim kimi xarakterizə edərək, onun hələ SSRİ dövründə Azərbaycana rəhbərlik etdiyi zaman milli və mənəvi dəyərlərə, adət-ənənələrə xüsusi önəm verdiyini, öz xalqı üçün misilsiz xidmətlər göstərdiyini, müasir Azərbaycanın indiki vəziyyətə gəlib çatmasında müstəsna rolunun olduğunu deyib. İ.Yosipoviç 1990-cı illərdə Azərbaycanın keçdiyi çətin dövrdən söhbət açaraq məhz Heydər Əliyevin sayəsində ölkədə sabitliyin və inkişafın əldə olunduğunu bildirib.
Xorvatiya xarici və Avropa işləri nazirinin müavini Frano Matuşiç Ulu Öndər Heydər Əliyevin dünya səviyyəli ictimai-siyasi xadim olduğunu, onun rəhbərliyi ilə Azərbaycanda hüquqi, demokratik, dünyəvi dövlət qurulduğunu diqqətə çatdırıb. F.Matuşiç Xorvatiya ilə Azərbaycan arasında diplomatik əlaqələrin 28 il əvvəl Prezident Heydər Əliyevin dövründə qurulduğunu, bunun ikitərəfli münasibətlərin və strateji tərəfdaşlığın uğurlu başlanğıcı olduğunu vurğulayıb. O, Heydər Əliyevin müdrik və uzaqgörən idarəçiliyi sayəsində Azərbaycanın bu gün beynəlxalq birliyin nüfuzlu və etibarlı tərəfdaşına çevrildiyini qeyd edərək, Ulu Öndərin böyük dövlət xadimi kimi firavan və inkişaf edən Azərbaycanın əsasını qoyduğunu bildirib.
Tədbir zamanı İsfar Sarabski kvarteti tərəfindən Azərbaycanın məşhur bəstəkarlarının əsərləri ifa edilib, Ulu Öndərin həyatını və fəaliyyətini əks etdirən videoçarx nümayiş olunub.
Bölmənin digər xəbərləri
