Etibar Mirzəyev: “Xəzər-2017” beynəlxalq təliminə 1100 nəfərlik şəxsi heyət cəlb edilib VİDEO
Bakı, 2 noyabr, AZƏRTAC
Azərbaycan Respublikası Fövqəladə Hallar Nazirliyinin təşkilatçılığı ilə Bakıda Xəzəryanı ölkələrin iştirakı ilə keçirilən “Xəzər-2017” beynəlxalq təliminə 1100 nəfərlik şəxsi heyət cəlb edilib.
AZƏRTAC xəbər verir ki, bunu “Xəzər-2017”yə rəhbərlik edən fövqəladə hallar nazirinin müavini, general-leytenant Etibar Mirzəyev noyabrın 2-də jurnalistlərə müsahibəsində deyib.
Təlimə artıq start verildiyini və ölkəmizdə bu qəbildən tədbirin ilk dəfə təşkil edildiyini vurğulayan E.Mirzəyev bildirib: “İki gün davam edəcək təlim Qaradağ rayonunda, gəmiqayırma zavodunun ərazisində keçirilir. Rusiyanın, Türkmənistanın, İranın, Qazaxıstanın xilasediciləri təlimdə fəal iştirak edirlər. Təlimə 1100 nəfərlik şəxsi heyət, 208 texnika, 2 təyyarə, 5 helikopter, 8 gəmi, xüsusi təlim görmüş 6 it cəlb edilib. Təlimlə əlaqədar birləşmiş qərargah yaradılıb. Bu qərargah vasitəsilə qüvvələr dənizdə, quruda və havada idarə olunacaq”.
Təlimdə fəal iştiraklarına görə 5 Xəzəryanı dövlətin xilasedicilərinə, onların rəhbərliyinə, eyni zamanda, təlimə qatılan yerli qurumlara minnətdarlığını bildirən nazir müavini vurğulayıb: “Təlimin məqsədi iştirakçı ölkələrin müvafiq qurumlarının aidiyyəti qüvvələrinin təcrübələrinin və peşəkarlıqlarının artırılması, onların havadan, sudan, qurudan birgə fəaliyyətinin təşkil olunmasıdır. Əsas məqsədlərdən biri də Xəzəryanı dövlətlərin xilasediciləri arasında əməkdaşlığın gücləndirilməsidir”.
Bölmənin digər xəbərləri
