Paytaxtda avtoxuliqanlıq edən sürücülər inzibati məsuliyyətə cəlb olunub VİDEO
Bakı, 12 iyun, AZƏRTAC
Bakıda avtoxuliqanlıq edərək yol hərəkətinin digər iştirakçılarının həyatına və mülkiyyətinə real təhlükə yaradan, cəmiyyətə açıq hörmətsizlik nümayiş etdirərək polisin qanuni tələbini yerinə yetirməyən sürücülər inzibati məsuliyyətə cəlb olunub.
Bakı Şəhər Baş Polis İdarəsinin Dövlət Yol Polisi İdarəsinin ictimai qurumlarla əlaqə bölməsinin rəisi, polkovnik Vaqif Əsədov AZƏRTAC-a bildirib ki, müəyyənləşdirilən sürücülər paytaxtın müvafiq rayon məhkəmələrinin qərarları əsasında həbs olunaraq inzibati məsuliyyətə cəlb ediliblər.
Onlardan Salmanov Xəyal İntiqam oğlu iyunun 10-da saat 12:30 radələrində “BMW-528” markalı 90-ON-083 dövlət qeydiyyat nişanlı avtomobillə Yasamal rayonu Kənar Dairəvi yolda olarkən irəlidə hərəkət edən digər nəqliyyat vasitəsilə düzgün ara məsafəsi saxlamayıb. Öndəki avtomobilin yolda keçid hüququna malik olduğu halda yol verməyib, ictimai qaydanı və əhalinin dincliyini nümayişkaranə pozaraq, cəmiyyətə açıq hörmətsizlik ifadə edən, yol hərəkəti qaydalarının davamlı olaraq pozulması ilə nəticələnən inzibati xəta tərkibi yaradan hallar törədib. Göstərilən əməllərin xüsusatlarına müvafiq olaraq X.Salmanov Yasamal Rayon Məhkəməsinin qərarı ilə İnzibati Xətalar Məcəlləsinin 327.1-ci, 331-ci və 511.1-ci maddələrində nəzərdə tutulan inzibati xəta törətməkdə təqsirli bilinib. Həmin Məcəllənin 34.3-cü maddəsinə əsasən X.Salmanovun nəqliyyat vasitələrini idarə etmək hüququ bir il müddətə məhdudlaşdırılmaqla barəsində 15 günlük həbs tətbiq olunub.
Digər təqsirli Hümbətov Elçin Məcnun oğlu iyunun 9-da saat 00:05 radələrində “Chevrolet” markalı 10-OZ-919 dövlət qeydiyyat nişanlı avtomobillə paytaxtın Tbilisi prospektində avtomobili idarə edərkən ictimai qaydanı və ictimai təhlükəsizliyi nümayişkaranə şəkildə davamlı olaraq pozmaqla inzibati xəta törədib. Göstərilən əməllərin xüsusatlarına müvafiq olaraq, E.Hümbətov Yasamal Rayon Məhkəməsinin qərarı ilə İnzibati Xətalar Məcəlləsinin 511.1-ci maddəsi ilə təqsirli bilinib. Onun nəqliyyat vasitəsinin idarə etmək hüququ bir il müddətə məhdudlaşdırılmaqla barəsində 30 günlük həbs tətbiq edilib.
Eləcə də təqsirli olaraq həbs edilən Hüseynov Kamal Vahid oğlu iyunun 11-də səhər saatlarında polisin qanunu tələblərinə tabe olmayıb. Polis əməkdaşları onu sakitliyə nizam-intizama dəvət etsələr də o buna məhəl qoymayıb, qəsdən tabesizlik nümayiş etdirib. Toplanan materiallar əsasında vətəndaşın əməlinə hüququ qiymət verilməsi üçün 17-ci polis bölməsində baxılaraq müvafiq rayon məhkəməsinə göndərilib. Nərimanov Rayon Məhkəməsinin qərarı ilə İnzibati Xətalar Məcəlləsinin 535.1-ci maddəsi ilə nəzərdə tutulan inzibati xətanı törətməkdə təqsirli bilinən K.Hüseynovun barəsində 10 gün müddətinə inzibati həbs növündə tənbeh tədbiri tətbiq edilib.
Həbs edilən hər üç şəxslə Daxili İşlər Nazirliyinin İnzibati qaydada Həbs Olunanların Saxlanılma Məntəqəsində keçirilən görüşdə profilaktik söhbətlər aparılıb. Yol polisinin fəaliyyətinin birbaşa olaraq, yollarda hərəkət iştirakçılarının təhlükəsizliyinə yönəldiyi onların diqqətinə çatdırılıb. Bildirilib ki, bu fəaliyyətin əsasını təşkil edən məsuliyyət hissi təkcə bir insanı yox, bütün cəmiyyəti qayğılandırır. Ona görə də yollarda hərəkət iştirakçılarının intizam və məsuliyyəti diqqət mərkəzində saxlanılır.
Avtomobillə cəmiyyətə açıq hörmətsizlik ifadə edən şəxslərin hər biri ilə fərdi qaydada profilaktik söhbətlər aparılıb. Görüşdə törədilən hər bir əmələ görə cəzalanan şəxslər bu əməllərindən peşmanlıq duyduqlarını bildirib, törətdikləri əməlin nə qədər təhlükəli olduğunu açıq etiraf etməklə sürücülərə yollarda daha həssas və diqqətli olmağı tövsiyə ediblər. Onlar sürücüləri yol hərəkəti qaydalarına əməl etməyə və sükan arxasında olan zaman digər hərəkət iştirakçılarına hörmətlə yanaşmağa dəvət edib, barələrində verilən qərarın əməllərinə adekvat olduğunu bildiriblər.
Bölmənin digər xəbərləri
