REGİONLAR
Qarabağa Böyük Qayıdışın carçısı olan Cocuq Mərcanlıdan reportaj FOTO VİDEO
Cəbrayıl, 14 oktyabr, A.Yavər, foto A.Məmmədov, AZƏRTAC
Sentyabrın 27-dən başlayaraq erməni faşistlərinin təxribatına şahidlik edən Cocuq Mərcanlıda həyat öz axarı ilə davam edir. Döyüşlər zamanı məğlubiyyətə düçar olan ermənilər Cocuq Mərcanlını da hədəf alıblar. Evlər dağılıb, infrastruktura ciddi ziyan dəyib. Amma Cocuq mərcanlıları heç nə qorxuda bilməyib. Kənd sakinləri güclü ordumuza güvənərək öz həyatlarına davam edirlər.
Qeyd edək ki, sentyabrın 27-si səhər saatlarından Ermənistan silahlı qüvvələri genişmiqyaslı təxribat törədərək cəbhəboyu zonada yerləşən Azərbaycan Ordusunun mövqelərini və yaşayış məntəqələrimizi iriçaplı silahlar, minaatanlar və müxtəlif çaplı artilleriya qurğularından intensiv atəşə tutub. Dinc sakinlər hədəf alınıb, onların evlərinə, əmlaklarına və infrastruktura ciddi ziyan dəyib. Ordumuz düşmənin hücumlarının qarşısını almaq, mülki əhalinin təhlükəsizliyini təmin etmək məqsədilə bütün cəbhəboyu əks-hücum əməliyyatına başlayıb.
AZƏRTAC-ın cəbhə bölgəsinə ezam olunmuş müxbiri xalqımızın dirçəliş, qələbə rəmzi olan Cəbrayılın Cocuq Mərcanlı kəndinə baş çəkib, sakinlərlə görüşüb.
1993-cü ilin oktyabrında Ermənistan silahlı birləşmələri tərəfindən işğal olunan kənd 1994-cü il yanvarın 5-də ulu öndər Heydər Əliyevin rəhbərliyi ilə ordumuzun həyata keçirdiyi uğurlu Horadiz əməliyyatı zamanı Füzuli rayonunun 22 yaşayış məntəqəsi ilə birgə düşmən tapdağından azad edilib. Dörd il əvvəl, aprel ayında isə Azərbaycan Ordusunun həyata keçirdiyi uğurlu əks-hücum əməliyyatı nəticəsində Lələtəpə yüksəkliyinin erməni işğalından azad edilməsi Cocuq Mərcanlıda yaşayışın bərpa olunmasına imkan verdi.
Ali Baş Komandan, Prezident İlham Əliyevin tapşırığı ilə Cocuq Mərcanlı kəndində yüzlərlə ev tikildi, infrastruktur yaradıldı və sakinlər uzun illərin həsrətindən sonra bu torpaqlara, dədə-baba yurdlarına qayıtdılar.
Beləliklə, azğın düşmənin xarabalığa çevirdiyi Cocuq Mərcanlı qısa bir zamanda bərpa olunaraq ikinci həyatına qovuşdu. Bu, Qarabağa Böyük Qayıdışın ilk müjdəçisi oldu.
Azərbaycan Ordusu ilə döyüşdən qaçan erməni hərbçilərinin hədəf aldığı dinc yaşayış məntəqələrimizdən Cocuq Mərcanlıda həyat indi də öz axarı ilə davam edir. Kənd sakinləri, böyükdən kiçiyədək hər kəs Şanlı Ordumuzun zəfərləri ilə qürur duyur. Kənddə Qələbə xəbərləri ilə coşub-daşan qaynar həyat hər anından bəlli olur.
Təsərrüfatlarında çalışan sakinlərin, küçədə oynayan uşaqların çöhrəsində qürur hissi açıq-aydın görünür.
Cocuq Mərcanlı sakini Şahsuvar Şirinovla söhbət zamanı bildirib ki, Ali Baş Komandan İlham Əliyevin birbaşa diqqət və qayğısı ilə yeni həyatın qayıtdığı Cocuq Mərcanlıda hər kəs torpaqlarımızın hamısının işğaldan azad ediləcəyi günün uzaqda olmadığına inanır. “Düşmən bizim kəndi də dəfələrlə hədəfə alıb, artilleriya atəşinə tutub. Hansı ki, bu kənddə dinc sakinlər yaşayır. Onlar bununla öz xislətlərini nümayiş etdirirlər. Evlərimizə, əmlaklarımıza, təsərrüfatımıza ciddi ziyan dəysə də, Azərbaycan əsgərinə və Ali Baş Komandanımıza güvənirik. Düşmənin məqsədi mülki əhalini qorxutmaqdır. Amma onların bu niyyəti həyata keçməyəcək”, - deyə Şahsuvar kişi bildirib.
Cocuq Mərcanlının azyaşlı sakinləri də məğrur baxışı ilə düşmənə göz dağı verir. Mətləb Həzizadə böyüyəndə hərbçi olacağını söyləyir: “Əsgərlərimizlə fəxr edirəm. Ən böyük arzum onların davamçısı olmaqdır”.
Söhbətimizə qoşulan Fərrux Şirinov da dostu ilə eyni fikirdədir. Hər gün əsgərlərimizin zəfər xəbərini eşidəndə, ermənilərin şanlı ordumuzun qarşısından qaçdıqlarını biləndə qürurlanır.
Sübhan Həzizadə də gələcəyin Vətən keşikçisi olmaq arzusu ilə yaşayır.
Beləcə Cocuq Mərcanlı sakinləri Azərbaycan əsgərinin qələbə xəbərlərini doğma yurdlarında böyük sevinclə, ruh yüksəkliyi ilə qarşılayırlar. Onların ümumi arzusu ondan ibarətdir ki, Qarabağımızın digər torpaqları da işğaldan azad edilsin, bütün məcburi köçkünlər öz yurd-yuvalarına qayıtsınlar. O günlər də uzaqda deyil!