20 Yanvarda xalqımız azadlıq naminə böyük qəhrəmanlıq nümunəsi göstərdi
Bakı, 19 yanvar, AZƏRTAC
1990-cı il yanvarın 19-dan 20-nə keçən gecə keçmiş imperiya ordusu tərəfindən Bakıda törədilmiş 20 Yanvar faciəsi xalqımızın tarixinə qanla yazılıb. 20 Yanvar həm də Azərbaycanın azadlığı və ərazi bütövlüyü uğrunda mübarizə tarixinə qəhrəmanlıq səhifəsi kimi yazılan gündür.
Bu fikirləri AZƏRTAC-a müsahibəsində filologiya elmləri doktoru, professor Sayalı Sadıqova bildirib. S.Sadıqova qeyd edib ki, həmin hadisələrdən əvvəl “xalqın xilaskarı” kimi təbliğ olunan ordu tərəfindən törədilən bu terror aktı insanlığa qarşı yönəlmiş ən ağır cinayətdir. İmperiya ordusu milli azadlıq, ölkənin ərazi bütövlüyü uğrunda mübarizəyə qalxmış dinc əhaliyə divan tutan totalitar sovet rejiminin cinayətkar mahiyyətini bütün dünyaya göstərdi. 20 Yanvar gecəsi günahsız insanlar - uşaqlar, qocalar, qadınlar, gənclər qəddarcasına qətlə yetirildi. O gecə tanklar, zirehli texnikalar Bakı küçələrində qarşılarına çıxan hər kəsi əzir, dəhşətli qırğınlar törədirdi. Yüzlərlə insanın ölümü ilə nəticələnən 20 Yanvar faciəsi bütün dünyada əks-səda doğurdu, mütərəqqi qüvvələrin qəzəb və hiddətinə səbəb oldu. Faciənin ertəsi günü Ulu Öndər Heydər Əliyev Azərbaycanın Moskva şəhərindəki daimi nümayəndəliyinə gələrək qanlı faciəni törədənlərə qarşı kəskin etirazını bildirib, günahkarların cəzalandırılmasını qətiyyətlə tələb edib.
Alim vurğulayıb ki, 20 Yanvar Azərbaycan xalqının iradəsini qıra bilmədi, insanlar öz azadlıq arzusu uğrunda inadkarlıqla mübarizəsini davam etdirdi. Xalqımız azadlıq naminə böyük qəhrəmanlıq nümunəsi göstərdi.
“Azərbaycanın azadlığı uğrunda şəhid olan Vətən övladlarının xatirəsi daim əziz tutulur. Azadlıq uğrunda şəhid olan qəhrəmanlarımızın uyuduğu Şəhidlər xiyabanı ümumxalq ziyarətgahına çevrilib. Şəhidlərin milli azadlıq, torpaq uğrunda mübarizə arzuları artıq gerçəkləşib. Azərbaycan Prezidenti, Müzəffər Ali Baş Komandan İlham Əliyevin rəhbərliyi, şanlı Ordumuzun gücü ilə Vətən müharibəsində biz böyük Zəfər qazandıq, torpaqlarımız işğaldan azad edildi. Bu il xalqımız 20 Yanvar hadisələrinin 33-cü ildönümünü qeyd edir, şəhidlərin əziz xatirəsini ehtiramla yad edir, Bakının ən möhtəşəm məkanında Vətən uğrunda canlarını qurban vermiş mərd, igid oğul və qızlarımızın uyuduğu Şəhidlər xiyabanı bizim üçün müqəddəs bir and yerinə, milli iradəmizin şanlı-şərəfli bir salnaməsinə çevrilib. Şəhidlərimiz və Şəhidlər xiyabanı azadlığımızın, müstəqilliyimizin, milli iradəmizin simvolu kimi bundan sonrakı nəsillərə də bir qürur mənbəyi olacaq”, - deyə professor bildirib.
Bölmənin digər xəbərləri
