DİM-də “Tapşırıq halqaları modeli: metodologiya və tətbiq imkanları” kitabının təqdimatı olub VİDEO
Bakı, 19 dekabr, AZƏRTAC
Dekabrın 19-da Dövlət İmtahan Mərkəzində (DİM) Bakı Avropa Liseyinin direktoru psixologiya elmləri üzrə fəlsəfə doktoru Zülfiyyə Veysovanın “Tapşırıq halqaları modeli: metodologiya və tətbiq imkanları” kitabının təqdimat mərasimi keçirilib.
Təqdimatdan öncə qonaqlar DİM-in elmi-metodiki nəşrləri və xidmətləri ilə bağlı sərgiyə baxış keçiriblər.
AZƏRTAC xəbər verir ki, tədbiri açan Dövlət İmtahan Mərkəzinin İdarə Heyətinin sədri Məleykə Abbaszadə müəllif haqqında – onun müasir təlim və tədris prosesində yeniliklərin təşəbbüsçüsü kimi təhsil sahəsində xidmətləri barədə müsbət fikirlərini söyləyib, onun beynəlxalq standartlara uyğun müasir təhsil sisteminin qurulmasında mühüm rolu, peşəkar, faydalı bilik və bacarıqlara yiyələnən, rəqabətə davamlı insan resurslarının yetişdirilməsinə verdiyi töhfəsindən danışıb.
M.Abbaszadə, həmçinin DİM-in yeni “Gənc psixometrik” təcrübə proqramı haqqında məlumat verib. Sədr üç ay müddətində davam etməsi nəzərdə tutulan təcrübə proqramının əsas məqsədinin təhsilin qiymətləndirilməsi və psixometriya sahəsində nəzəri və praktik biliklərin mənimsənilməsi, statistik təhlil metodlarının öyrədilməsi və qiymətləndirmə alətlərinin effektiv tətbiq edilməsi üçün mütəxəssislər hazırlamaq olduğunu qeyd edib. DİM-in könüllülər proqramı ilə bağlı da danışan sədr gənclərin layihəyə böyük maraq göstərdiyini və dörd mindən artıq şəxsin qeydiyyatdan keçdiyini vurğulayıb.
Ardınca müəllif Zülfiyyə Veysova təqdim etdiyi kitabın yazılma tarixi, məqsədləri, uzunmüddətli araşdırma və tədqiqatların aparılması əsasında yaradılmış müəllimlər üçün məqsədəuyğun, səmərəli və faydalı alətin hazırlanması haqqında geniş məlumat verib.
Digər çıxışçı – görkəmli pedaqoq Ənvər Abbasov kitabın əhəmiyyəti haqqında müsbət fikirlərini bildirib. O, təqdim olunan “Tapşırıq halqaları” alətindən istifadə nəticəsində şagirdlərin təlim prosesinin gedişatını daha asan başa düşmələri, habelə təlim tapşırıqları və gözlənilən təlim nəticələrinin hazırlanmasını daha da asanlaşdıran bir vəsait olduğunu qeyd edib.
Müəllif və müzakirələrdə çıxış edən mütəxəssislər bu kitabın müxtəlif koqnitiv proseslərin formalaşmasına yönəldilmiş tapşırıqların hazırlanmasında müəllim və metodistlərə, təlim standartları, kurikulum, tədris vəsaiti və dərslikləri yazan müəlliflərə, qiymətləndirmə üzrə təhsil ekspertlərinə kömək edə biləcək alət kimi faydalı olduğunu vurğulayıblar.
Bölmənin digər xəbərləri
