İQTİSADİYYAT
AKTA-da ölkənin kibertəhlükəsizlik ekosisteminin gücləndirilməsinə dair müzakirələr aparılıb
Bakı, 12 sentyabr, AZƏRTAC
Azərbaycan Kibertəhlükəsizlik Təşkilatları Assosiasiyasının (AKTA) İdarə Heyətinin onlayn formatda növbəti iclası keçirilib.
AKTA-dan AZƏRTAC-a bildirilib ki, İdarə Heyətinin sədri Elvin Balacanov tərəfindən iclasın gündəliyi elan edildikdən sonra cari ilin iyun-avqust ayları ərzində Assosiasiyanın fəaliyyətinə dair hesabatı iclas iştirakçılarının diqqətinə çatdırılıb. Qeyd olunan dövr ərzində maarifləndirmə, təhsil, əməkdaşlıq, tədqiqat və inkişaf istiqamətləri üzrə müəyyən olunmuş fəaliyyət istiqamətlərinə müvafiq olaraq AKTA tərəfindən atılmış addımlar, o cümlədən keçirilmiş görüşlər, icra edilmiş layihələr və üzvlərlə aparılmış fəaliyyətin nəticələrinə dair məlumatlar iclas iştirakçıların rəy və təkliflərinin əldə olunması üçün təqdim edilib.
Gündəlikdə duran əsas məsələlərdən birini də AKTA üzvlüyünə qəbul olunmaq üçün fiziki şəxslər - mütəxəssislər və hüquqi şəxslər tərəfindən edilmiş çoxsaylı müraciətlərin müzakirəsi təşkil edib. İdarə Heyətinin üzvləri arasında keçirilmiş səsvermə nəticəsində əldə olunmuş qərara əsasən “Azercell Telecom” MMC, “Caspel” MMC, “Azerconnect” MMC, Gais Cyber Security, “Azərbaycan Robotexnika Mühəndisliyi” MMC, Naxçıvan Muxtar Respublikası İnternet və Yeni Texnologiyaların Tədrisi Mərkəzi, “İKTex” MMC, “İnnovation Technologies” MMC şirkətlərinin AKTA üzvlüyünə qəbul olunmasına dair qərar qəbul edilib.
Daha sonra, Azərbaycan Respublikası Prezidentinin 2023-cü il avqustun 28-də Sərəncamı ilə təsdiq edilmiş “Azərbaycan Respublikasının informasiya təhlükəsizliyi və kibertəhlükəsizliyə dair 2023-2027-ci illər üçün Strategiyası”nın ölkənin gələcək kibertəhlükəsizlik ekosisteminin gücləndirilməsində rolu və əhəmiyyəti müzakirə olunub, Strategiyanın həyata keçirilməsi istiqamətində AKTA tərəfindən də müvafiq istiqamətlər üzrə dəstəyin verilməsinin mühümlüyü qeyd olunub. Həmçinin iclasda gələcəkdə həyata keçiriləcək tədbir və layihələrə dair İdarə Heyətinin üzvləri arasında müzakirələr aparılıb.