İDMAN
Avropa çempionatının birinci günü maraqlı idman mübarizəsi ilə yadda qalıb
Bakı, 24 may, AZƏRTAC
Mayın 24-də Bakıda, Milli Gimnastika Arenasında keçirilən aerobika gimnastikası üzrə 11-ci Avropa çempionatının birinci günü maraqlı idman mübarizəsi ilə yadda qalıb.
AZƏRTAC xəbər verir ki, Azərbaycanın gənclərdən ibarət komandası Avropa çempionatının aerodans proqramında uğurla çıxış edərək finalda iştirak hüququ qazanıb.
Aysel Aslanzadə, Xədicə Quliyeva, Lalə Quliyeva, Fatimə Qurbanova, Emiliya Mahmudova, Eleonora Yusifovadan ibarət komanda 15,300 xalla səkkizinci olub. Bu yarışda Rusiya, Rumıniya, Macarıstan, İtaliya, Almaniya, Portuqaliya və İspaniya yığmaları da finala yüksəlib.
Qadınların fərdi proqramında Darya Tixonova (Rusiya, 20,750 xal), Anastasiya Dmitriyeva (Rusiya, 20,700 xal), Dora Akoşegi (Macarıstan, 20,350 xal), Sara Kutini (20,150 xal), Anastasiya Kuraşvili (Ukrayna, 20,100 xal), Borislava İvanova (Bolqarıstan, 20,050 xal), İlona Qorgeni (Macarıstan, 20,050 xal) və Ana Rita Qomes (Portuqaliya, 20,000 xal) finala vəsiqə qazanıblar.
Kişilərin fərdi yarışlarında Anton Kolobov (Rusiya, 20,850 xal), Daniel Tavok (Rumıniya, 20,450 xal), Ruy Kansado (Portuqaliya, 20,450 xal), Migel Mane Qabarro (İspaniya, 20,350 xal), Leonard-Marian Manta (Rumıniya, 20,150 xal), Damir Manafov (Rusiya, 20,100 xal), Andrea Kolnaqo (İtaliya, 19,750 xal) və Ahmet Meric Turmamis (Türkiyə, 19,500 xal) finala adlayıblar.
Trio proqramında isə Rusiyanın birinci komandası (20,000 xal), Macarıstanın ikinci komandası (19,600 xal), İtaliyanın birinci komandası (19,250 xal), Macarıstanın birinci komandası (19,150 xal), Bolqarıstanın ikinci komandası (19,050 xal) və İspaniyanın birinci komandası (19,050 xal) finalda mübarizə aparacaqlar.
Gənclər arasında qarışıq cütlüklərin yarışında isə Rumıniya (iki cütlük), Portuqaliya, İtaliya, Rusiya (iki cütlük), Ukrayna və İspaniya təmsilçiləri finala vəsiqə qazanıblar.
Çempionatda gənclərin yarışında Rusiya komandası ümumi nəticələrə görə birinci yeri tutub. Rumıniya yığması ikinci, Macarıstan komandası isə üçüncü pillədə yer alıb.
Avropa çempionatının ikinci günündə - mayın 25-də mübarizəyə böyük aerobika gimnastları qatılacaqlar. Yarışların sonuncu günündə isə Avropa çempionları müəyyənləşəcək.
Çempionatda 22 ölkədən 400-ə yaxın böyük və gənc gimnast qadın və kişi, qarışıq cütlük, üçlük, qrup, həmçinin aerodans, aerostep (yalnız böyüklər) yarışlarında mübarizə aparırlar.