SİYASƏT
Avropa İttifaqının monitorinq missiyası regionda münasibətləri daha da gərginləşdirəcək
![Avropa İttifaqının monitorinq missiyası regionda münasibətləri daha da gərginləşdirəcək](/files/2023/1/1200x630/1676359136145037847_1200x630.jpg)
Bakı, 14 fevral, AZƏRTAC
Avropa İttifaqının regionda sülh missiyası adı altında, əslində, sülhə təhdid yaradan, gərginliyi daha da artıran monitorinq missiyasının Ermənistan ərazisində yerləşdirilməsində əsas məqsəd postmüharibə dövründə əldə olunmuş razılaşmaların üzərindən xətt çəkməkdir. Bu, həm beynəlxalq hüququn norma və prinsiplərinə, həm də İkinci Qarabağ müharibəsindən sonra ölkələr arasında imzalanmış bəyanatların qarşıya qoyduğu vəzifələrin icrasına problem yaradır. Azərbaycan regionda sülh təşəbbüsçü kimi tanınır və bunun reallaşdırılması istiqamətində əsaslı addımlar atır. Təbii ki, Azərbaycanın Qələbəsini, Ermənistanın isə məğlubiyyətini hələ də həzm edə bilməyən ermənipərəst qüvvələr və ikili standartlar mərəzindən qurtula bilməyən bəzi beynəlxalq təşkilatlar ciddi narahatdırlar.
Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.
O deyib ki, Avropa İttifaqının yeni missiya formalaşdıraraq ona əlavə mandatlar vermək və Ermənistana göndərmək qərarı bu quruma olan inamı tamamilə heçə endirib. Birincisi, ona görə ki, Azərbaycanla Ermənistan arasında sərhədlərin delimitasiyası və demarkasiyası indiyədək həyata keçirilməyib. Bu səbəbdən də Avropa İttifaqının Ermənistana müşahidə missiyası göndərməsi beynəlxalq hüququn normalarına ziddir. Digər tərəfdən, Praqa razılaşmasına əsasən, Avropa İttifaqı vəziyyətin qiymətləndirilməsi üçün regiona qısamüddətli missiya göndərməli idi. Bəs nə baş verdi ki, bu qurum bu dəfə uzunmüddətli missiya göndərmək qərarına gəldi? Hazırda regionda Rusiya sülhməramlılar 2020-ci il 10 noyabr tarixli üçtərəfli Bəyanata əsasən, fəaliyyətlərini davam etdirirlər. Avropa İttifaqının monitorinq missiyası ilə sülhməramlılar arasında gərginlik yaranıb-yaranmayacağına kim zəmanət verə bilər? Çünki bu missiyanın təşkilatçısı və regionda yerləşdirilməsinin əsas təşəbbüskarlarından biri Fransadır. Fransa ATƏT-in Minsk qrupunun tərkibində 28 il ərzində iki ölkə arasında münasibətlərin normallaşdırılmasında hansı rol oynadığı hər birimizə məlumdur. Bu təşkilat fəaliyyətdə olduğu müddət ərzində yalnız Ermənistanın işğalçılıq siyasətini legitimləşdirməklə məşğul oldu”.
Ə.Bədəlov hesab edir ki, rəsmi Paris bütün imkanları ilə Cənub Qafqaza soxulmağa can atır. Fransa bütün vasitələrlə çalışır ki, Ermənistan onu regiona dəvət etsin. Ancaq bunu üstüörtülü şəkildə həyata keçirmək istəyir. Fransa öz hərbçilərini regionda yerləşdirmək niyyətini həyata keçirmək məqsədilə monitorinq missiyasından istifadə edir. Regionda gərginliyi artıran xarici ölkə hərbçilərinin monitorinq missiyası adı altında Ermənistan ərazisində yerləşdirilməsi sülh müqaviləsinin imzalanmasına problem yaradacaq. “Aldığım məlumata görə, monitorinq missiyasının tərkibində Fransanın yüksək rütbəli hərbçiləri və kəşfiyyatçıları var. Onların əsas məqsədləri Ermənistanın Şərq, Qərb və Şimal qərbində rusiyalı hərbçilərin hərəkətlərini izləmək və buraxılış məntəqələri haqqında dəqiq məlumat əldə etməkdir. Deməli, bu missiyanın əsas məqsədi regionda monitorinq adı altında kəşfiyyat aparmaqdır. Bu vaxta qədər baş verən hadisələr də təsdiqləyir ki, Ermənistan həmişə küləyin əsdiyi istiqamətə əyilib. İndi də Rusiyadan üzünü Avropa İttifaqının monitorinq missiyası adı ailə Fransaya çevirib. Görünür, Fransa Prezidenti Emmanuel Makronun və bu ölkənin parlamentinin ölkəmiz haqqında şər-böhtanları və qərəzli qətnamələri Ermənistanı ümidləndirib və “bəlkə də qaytardılar” xülyası ilə yaşamağa başlayıb”, - deyə o qeyd edib.
Ə.Bədəlov Ermənistanın anti-Rusiya təbliğatından da söhbət açıb. Bildirib ki, Rusiyanın maraqlarına zidd olan missiyanın uzun müddətə regiona cəlb olunması təkcə Azərbaycanla sərhəddə deyil, bütün Ermənistan ərazisində fəaliyyət göstərməsi işğalçı ölkənin açıq şəkildə Rusiyaya meydan oxumasıdır. Təbii ki, bu da Ermənistan üçün ciddi başağrısına çevriləcək. Çünki indiyə qədər gah Rusiya, gah da İranla “dostluq edən Ermənistan indi də Fransa ilə “qardaşlıq” münasibətləri qurmaq istəyir. Bu da Ermənistanın müstəqil siyasət yeridə bilməsindən irəli gəlir.
Siyasi şərhçi vurğulayıb ki, Fransanın məqsədi sülh müqaviləsinin imzalanmasına kömək etmək yox, regionda öz maraqlarını təmin etməkdir. Fransanın Ermənistan-Azərbaycan münasibətlərinin normallaşdırılmasında heç bir marağı yoxdur. “Əgər belə bir marağı olsaydı, 28 il ərzində bu istiqamətdə irəliyə doğru bir addım atardı. Avropa İttifaqının uzunmüddətli monitorinq missiyası Fransanın və Avropada digər ermənipərəst qüvvələrin növbəti sövdələşməsidir. Fransanın müxtəlif vasitələrlə regiona soxulmağa cəhd etməsi Ermənistanı növbəti fəlakətə doğru aparır”, - deyə Ə.Bədəlov bildirib.