Avropada satılan yanacaq qiymətlərində kəskin fərq qeydə alınıb
Buxarest, 23 aprel, AZƏRTAC
Rumıniya 2026-cı ilin mart ayında Avropa İttifaqında yanacaq qiymətlərinin artım tempinə görə ikinci yerdə qərarlaşıb.
AZƏRTAC xəbər verir ki, bu barədə Avrostat məlumat yayıb.
Məlumata görə, Rumıniyada yanacaq qiymətləri illik müqayisədə təxminən 19 faizdən çox artıb və bu göstərici ilə ölkə yalnız Almaniyadan geri qalır.
Ümumilikdə Avropa İttifaqında da yanacaq qiymətlərində ciddi artım müşahidə olunub. 2026-cı ilin mart ayında dizel yanacağının qiyməti illik müqayisədə təxminən 19 faiz, benzinin qiyməti isə 9 faizdən çox yüksəlib.
Aylıq müqayisədə də artım davam edib. Fevral ayı ilə müqayisədə mart ayında həm dizel, həm də benzin qiymətlərində nəzərəçarpacaq bahalaşma qeydə alınıb. Məlumatda qeyd olunur ki, yanacaq qiymətlərində artım Avropa İttifaqının demək olar bütün ölkələrində müşahidə olunub. Ən yüksək artım Almaniya, Rumıniya, Niderland, Latviya və Avstriyada qeydə alınıb. Eyni zamanda bəzi ölkələrdə fərqli dinamika müşahidə edilib. Macarıstan və Sloveniyada yanacaq qiymətlərində müəyyən azalma qeydə alınsa da, ümumi tendensiya artım istiqamətində qalır.
Qeyd olunur ki, yanacaq qiymətlərində artım qlobal enerji bazarındakı dəyişikliklər və geosiyasi gərginliklərlə əlaqələndirilir ki, bu da neft qiymətlərinə birbaşa təsir göstərir.
Bölmənin digər xəbərləri
