Azərbaycan Prezidenti ADA Universitetində təcrübəli lider kimi vacib mesajlar verdi ŞƏRH
Bakı, 10 aprel, AZƏRTAC
ADA Universitetində beynəlxalq siyasətin müzakirəsinə həsr olunan yeddinci beynəlxalq forumda da maraqlı mesajlar verildi. Rekord sayda iştirakçının qatıldığı toplantıda Prezident İlham Əliyevə ünvanlanan suallar regional və qlobal münaqişələr fonunda dünyanın gələcəyi, Azərbaycanın cərəyan edən proseslərdə rolu ilə bağlı idi. Forum iştirakçıları işğaldan azad olunmuş ərazilərə səfər etdilər, münaqişənin tarixi, Azərbaycanın bugünkü reallığı, beynəlxalq dəstək olmadan ölkənin ərazi bütövlüyünü və suverenliyini, eləcə də bərpa-quruculuq işlərini öz gücü ilə təmin etməsinə dair uğurlu təcrübə ilə tanış oldular. Regionda yaranan yeni reallıqlar fonunda dünyanın ən təcrübəli liderlərindən biri kimi dövlətimizin başçısına müxtəlif suallar ünvanlandı.
Bu sözləri AZƏRTAC-a açıqlamasında Milli Məclisin deputatı Nigar Məmmədova söyləyib.
O bildirib ki, forumda, həmçinin Cənubi Qafqaza uzunmüddətli baxışa dair Azərbaycanın mövqeyinə diqqət çəkildi. Bir daha bəyan olundu ki, məhz Azərbaycan ərazilərinin Ermənistan tərəfindən işğalı Cənubi Qafqaza nisbətən inteqrasiya olunmuş region kimi inkişaf etməyə imkan vermədi. “Halbuki bizim hamımızın buna imkanı var idi. Ermənistan regionda reallaşan layihələrin bir hissəsi ola bilərdi. Lakin “böyük Ermənistan” xülyası buna mane oldu. Cənubi Qafqazda əməkdaşlıq Azərbaycan və Ermənistan arasında sazişin imzalanmasından asılıdır. Yalnız belə olan halda Cənubi Qafqazı inteqrasiya olunmuş regiona çevirməyə cəhd etmək üçün heç bir maneə qalmayacaq”, - deyən dövlətimizin başçısı qeyd edib ki, təbii olaraq bu proses silahlanma fonunda baş verə bilməz. Azərbaycan Prezidenti bu kontekstdə diqqəti Ermənistanın silahlanmasına yönəldib. Rəsmi Bakı açıq şəkildə xəbərdarlıq edir ki, Ermənistanın ölümcül silahlarla silahlanması regionda sülhə və sabitliyə yox, yeni gərginlik ocaqlarının yaranmasına xidmət edir. Bu reallıqlar fonunda Azərbaycan yeni siyasi qarşıdurma təhlükəsi görür. Yəni, son 5 ilin mənzərəsi onu deməyə əsas verir ki, postmüharibə vəziyyətinin necə inkişaf etməsi Ermənistanın davranışından asılıdır. Tərəflər arasında etimadın qurulması isə kiçik addımlarla başlaya bilər. Qərb dairələrinin anti-Azərbaycan fəaliyyətinə də toxunan dövlətimizin başçısı Avropada Cənubi Qafqazda ayırıcı xətlər yaratmaq istəyən bəzi qüvvələrin səylərinin heç bir nəticə verməyəcəyini vurğuladı”, - deyə N.Məmmədova vurğulayıb.
Deputatın sözlərinə görə, Azərbaycan-ABŞ münasibətləri forum iştirakçılarını maraqlandıran mövzulardan biri idi. Bu suala cavab olaraq Azərbaycan Prezidenti bildirdi ki, rəsmi Bakı Vaşinqton üçün çox mühüm tərəfdaş ola bilər. Azərbaycan Tramp administrasiyası ilə çox güclü, proqnozlaşdırılabilən, uzunmüddətli strateji əlaqələrə başlayacağı vaxtı gözləyir. Ölkəmizin Qoşulmama Hərəkatına sədrliyi, COP29-un ev sahibi kimi bu kontekstdə Qlobal Cənubla Qlobal Şimal arasında körpülərin qurulmasında oynadığı rol da uğurlu təcrübə kimi qiymətləndirilir. Orta güc kimi Azərbaycanın yeni dünya nizamında rolu böyük əhəmiyyətə malikdir. Eyni zamanda, Azərbaycanın Türk dünyası ilə əlaqələrinə də diqqət çəkildi. Dövlətimizin başçısının da bəyan etdiyi kimi, Azərbaycan Türk Dövlətləri Təşkilatını daha güclü və nəticəyə yönələn təşkilat kimi görmək istəyir. TDT mühüm qlobal iştirakçıya çevrilməlidir.
Beləliklə, ADA-da keçirilən forum bu dəfə də maraqlı müzakirələrlə yadda qaldı. Burada verilən bəyanatlar həm də Azərbaycanın yaratdığı reallıqların dünyaya təqdim olunması baxımından əhəmiyyətli oldu.
Bölmənin digər xəbərləri
