AZƏRTAC xəbər verir ki, Azərbaycan Prezidenti İlham Əliyev oktyabrın 6-da “Bakıelektrikşəbəkə” Açıq Səhmdar Cəmiyyətinin “Bilgəh” və “Buzovna” yardımçı stansiyalarının açılışında iştirak etmişdir.

Prezident İlham Əliyev əvvəlcə 35/10/6 kilovoltluq “Bilgəh” yardımçı stansiyasına gəldi. Burada dövlətimizin başçısını inşaatçılar və paytaxt energetikləri səmimiyyətlə qarşıladılar.

“Bakıelektrikşəbəkə” ASC idarə heyətinin sədri Baba Rzayev dövlətimizin başçısına məlumat verdi ki, 5 ay ərzində inşa edilmiş

yardımçı stansiya ən müasir standartlara cavab verir. Burada 3 transformator quraşdırılmış, ərazidə abadlıq və yaşıllaşdırma işləri aparılmışdır. Stansiya Bilgəh qəsəbəsinin və ətraf ərazilərin dayanıqlı və keyfiyyətli elektrik enerjisi ilə təchizatına tam imkan verir.

Prezident İlham Əliyev yardımçı stansiyadakı 35 kilovoltluq paylayıcı qurğu ilə tanış oldu. Bildirildi ki, burada quraşdırılan daxili avadanlıq Almaniyanın tanınmış “Siemens” firmasının istehsalıdır və Bakıda yığılıbdır. Bütün inkişaf etmiş ölkələrdə bu avadanlıq

geniş tətbiq olunur. Yaxın vaxtlarda Azərbaycan özü də belə avadanlığın ixracına başlamaq imkanına malik olacaqdır.

İLHAM ƏLİYEV: Əlbəttə, biz qonşu ölkələrə ixrac edə bilərik.

BABA RZAYEV: Cənab Prezident, mən təsəvvür edirəm ki, bir ildən sonra region ölkələrinə ixrac edə biləcəyik.

İLHAM ƏLİYEV: İlk növbədə, gərək öz tələbatımızı təmin edək. Ondan sonra, əlbəttə, ixrac məhsullarının yaranması çox böyük əhəmiyyət kəsb edir.

Dövlətimizin başçısına bildirildi ki, Prezidentin tapşırığına əsasən,

2008-ci ilin sonunadək “Bakıelektrikşəbəkə”nin balansında olan bütün obyektlər tam müasirləşdiriləcək, yeniləri inşa olunacaqdır. 

İLHAM ƏLİYEV: “Barmek”in bizim energetika sisteminə vurduğu zərbə çox böyük oldu. İndi bunu aradan qaldırmaq, vəziyyəti sağlamlaşdırmaq üçün nə qədər böyük işlər görürük. Bax, reallıq budur. Gələn ilin sonuna qədər çalışın ki, maksimum dərəcədə bütün infrastrukturu yeniləşdirin, həm xətlərin çəkilişini, həm də yardımçı stansiyaların tikintisini başa çatdırın. İndi bizim kifayət qədər enerji gücümüz var. Yəni biz stansiyaları əsasən ona görə tikirik ki, əhali tam şəkildə, fasiləsiz elektrik enerjisi alsın.

Bildirildi ki, hava xətlərinin yeraltı kabellərlə əvəzlənməsi də diqqətdə saxlanılır. İndiyə qədər 700 kilometr uzunluğunda 35 kilovoltluq hava xətti yüksək keyfiyyətli yeraltı kabellə əvəzlənibdir. Bütün işlər perspektiv nəzərə alınmaqla görülür.

İLHAM ƏLİYEV: Yəni burada gələcək inkişafı da nəzərə almısınız?!

BABA RZAYEV: Bəli, güc 3,6 dəfə artırıla bilər. Bu parametrlərə malikdir və gələcək planlar nəzərə alınıbdır.

İLHAM ƏLİYEV: Bilgəh gözəl bir yerdir. Burada həm çoxlu binalar var, bağ evləri var, həm də yeni mehmanxana tikilib və tikiləcəkdir. Elə etməliyik ki, burada gələcəkdə də təminat tam şəkildə yüksək səviyyədə olsun. İlk növbədə, bu, burada yaşayan əhali üçün lazımdır. Biz bunu təmin etməliyik.

Daha sonra Prezident İLHAM ƏLİYEV energetika sisteminin müasirləşdirilməsinə dövlətin köməyi ilə yanaşı, istifadə olunan elektrik enerjisi haqqının tam toplanmasının da zəruriliyini vurğulayaraq dedi: İndi gərək yığım problemini də aradan qaldırasınız. Son bir neçə ay ərzində bütövlükdə Azərbaycanda elektrik enerjisi haqqının yığılmasında böyük irəliləyiş var. Ölkə üzrə təxminən 80-85 faiz təşkil edir. Ən ucqar rayonlarda misal üçün 100 faiz, 95 faiz yığılır. Amma Bakıətrafı qəsəbərlədə, - mən adlarını çəkmək istəmirəm, - yığım 6 faiz, 10 faiz, 15 faizdir. Burada insanlar ən ucqar kəndlərdəki insanlardan pis yaşamırlar. Sadəcə olaraq, elektrik enerjisinin haqqını ödəmək lazımdır. Onda bu sahədə Azərbaycanda heç bir problem yaranmayacaqdır. Onda enerji təminatı da lazımi səviyyədə olacaqdır. Siz çalışın ki, bunu təmin edin.

Mən başa düşürəm, bəzi hallarda insanlar çətinlik çəkirlər, hələ yoxsul təbəqə var. Biz onlara da öz qayğımızı göstərməliyik. Amma elə adamlar var ki, hər şeyi - bağı da, maşınları da var, ancaq elektrik enerjisinin pulunu ödəmir. Bax, bunlara qarşı ciddi mübarizə aparılmalıdır. Çalışın, maksimum dərəcədə, ilk növbədə, imkanı olan adamlardan yığın. Azərbaycanda işlər yaxşı gedir, insanların həyat səviyyəsi yaxşılaşır. Elə olmalıdır ki, hər bir insanın imkanı olsun ki, elektrik enerjisinin pulunu ödəsin.

“Bilgəh” yardımçı stansiyasındakı digər 10 kilovoltluq paylayıcı qurğu da ən müasir standartlara uyğundur. Prezidentə bildirildi ki, “Bakıelektrikşəbəkə”nin investisiya proqramına uyğun olaraq, bu ilin sonuna qədər daha bir neçə belə yardımçı stansiya istifadəyə veriləcəkdir. Bütün görülən işlər nəticəsində Bakıda və ətraf qəsəbələrdə elektrik enerjisi təchizatı ilə bağlı problemlər tam aradan qaldırılacaqdır.

Yardımçı stansiya ilə tanışlıqdan razılığını bildirən dövlətimizin başçısı bu tədbirlərin ildən-ilə daha da gücləndiriləcəyini vurğuladı.

Sonra Azərbaycan Prezidenti İlham Əliyev 110/35/10 kilovoltluq “Buzovna” yardımçı stansiyasında görülən işlərlə tanış olmaq üçün əraziyə gəldi. Energetiklər dövlətimizin başçısını səmimiyyətlə qarşıladılar.

Bu obyekt də dövlət başçısının tapşırığına əsasən, paytaxtın elektrik enerjisinə olan tələbatının tam

dənilməsi, şəbəkələrin yenidən qurulması və modernləşdirilməsi məqsədi ilə “Bakıelektrikşəbəkə”nin reallaşdırdığı yeni inkişaf proqramı çərçivəsində tikilmişdir. Yardımçı stansiya Bakının Sabunçu və Əzizbəyov rayonlarının elektrik enerjisi ilə təchizatının yaxşılaşdırılmasına sanballı töhfədir. Proqram iki mərhələdə həyata keçirilir və 2020-ci ilə qədər davam edəcəkdir.

Prezident İlham Əliyev yardımçı stansiyanın texniki-iqtisadi göstəriciləri ilə tanış oldu. Burada görülmüş abadlıq və yaşıllaşdırma işləri də göz oxşayır.

Dövlətimizin başçısına Buzovna-Bilgəh zonasının elektrik enerjisi

təchizatının sxemi barədə məlumat verildi. Bildirildi ki, Prezidentin Ehtiyat Fondundan ayrılan vəsait indiyə qədər əsaslı tədbirlərin həyata keçirilməsində böyük rol oynamışdır. Həmin vəsait hesabına 35/10 kV-luq “Amburan” yardımçı stansiyası tikilmiş, 110/35/6 kV-luq “Maştağa” yardımçı stansiyasının isə genişləndirilməsi nəzərdə tutulmuşdur. Ümumi gücü 148 meqavat təşkil edən yardımçı stansiyaların tikintisinə bu ilin aprelində başlanmışdır. Tikinti-quraşdırma işlərinin ümumi smeta dəyəri 8 milyon 774 min 177 manatdır. Bu yardımçı stansiyaların tikintisi və yenidən qurulması Maştağa, Nardaran, Buzovna və Bilgəh qəsəbələrinin, hazırda istifadədə olan və tikilən turizm-istirahət mərkəzlərinin etibarlı və keyfiyyətli elektrik enerjisi ilə təmin edilməsinə imkan verəcəkdir.

“Bakıelektrikşəbəkə”nin rəhbəri bütün bunlara görə Prezidentə şəbəkənin kollektivi adından minnətdarlığını bildirdi.

Dövlətimizin başçısı dedi ki, siz də yaxşı işləyirsiniz. Dövlət də sizə həm Prezidentin Ehtiyat Fondundan, həm başqa mənbələrdən kömək göstərir. İndi artıq özünüz də pul qazanır, onu investisiya şəklində belə işlərə yönəldirsiniz. Bu, bir daha onu göstərir ki, “Bakıelektrikşəbəkə” şirkətinin yaradılması, dövlətin nəzarətinə keçməsi barədə qəbul etdiyimiz qərar düzgün idi. İndi işlər yaxşı gedir. Həm dövlət nəzarəti, həm də dövlətin köməyi var və görülən işlər də göz qabağındadır.

Sonra dövlətimizin başçısı yardımçı stansiyanın idarəetmə otağına gəldi, düyməni basaraq stansiyanı işə saldı.

Prezident İlham Əliyev paylayıcı qurğuların iş prinsipləri ilə də maraqlandı. Bildirildi ki, digər paylayıcı qurğularda olduğu kimi, burada da Bakıda yığılan ən müasir avadanlıq quraşdırılmışdır. Hazırda paytaxtın bütün yerlərində bu cür tədbirlər görülür.

Dövlətimizin başçısı ulu öndərin və özünün energetiklərlə keçirdiyi görüşləri, yeni elektrik stansiyalarının təməlqoyma və istifadəyə verilməsi mərasimlərini əks etdirən fotoşəkillərə də baxdı, görülən işlərdən razılığını bildirdi, kollektivə yeni uğurlar arzuladı.